لاہور:سینئر صوبائی وزیر مریم اورنگزیب سے یو ایس قونصل جنرل سٹیٹسن سینڈرز نے ملاقات کی، جس میں پنجاب میں مصنوعی ذہانت (AI) کے فروغ، زراعت، صحت، تعلیم، ماحولیات اور انفراسٹرکچر کے شعبوں میں باہمی تعاون کو بڑھانے پر تفصیلی تبادلہ خیال کیا گیا۔
ملاقات کے دوران گفتگو کرتے ہوئے سینئر صوبائی وزیر کا کہنا تھا کہ وزیراعلیٰ پنجاب مریم نواز کی قیادت میں صوبے کے تمام شعبوں کو جدید تقاضوں کے مطابق ڈھالا جا رہا ہے۔ اس سلسلے میں صوبے میں مصنوعی ذہانت کا باقاعدہ محکمہ بھی قائم کر دیا گیا ہے، جبکہ کلائمیٹ، زراعت اور سیف سٹیز جیسے اہم شعبوں کو بھی AI ٹیکنالوجی سے منسلک کیا جا رہا ہے۔ انہوں نے مزید بتایا کہ وزیراعلیٰ کی متحرک ٹیم عوام کی فلاح و بہبود کے لیے دن رات کوشاں ہے۔
مریم اورنگزیب نے امریکی قونصل جنرل کو بریفنگ دیتے ہوئے بتایا کہ پنجاب حکومت عوام کو عالمی معیار کی سفری سہولیات فراہم کرنے کے لیے ہائی اسپیڈ ٹرین اور 5 ہزار الیکٹرک بسوں کے میگا پراجیکٹس پر تیزی سے کام کر رہی ہے۔ صوبے کے 8 بڑے روٹس پر یہ جدید بسیں اور ہائی اسپیڈ ٹرین چلائی جائے گی، جس کے بعد اسلام آباد سے لاہور کا سفر محض 2 گھنٹے 15 منٹ میں طے ہو سکے گا۔ اس کے علاوہ ماحولیاتی آلودگی سے نمٹنے کے لیے پنجاب میں پاکستان کی پہلی "کلائمیٹ آبزرویٹری” بھی قائم کی جا رہی ہے۔
زراعت کے شعبے پر روشنی ڈالتے ہوئے انہوں نے کہا کہ وزیراعلیٰ مریم نواز نے فوڈ اور زراعت کی ترقی کے لیے بین الاقوامی معیار کے مطابق "پنجاب ایگریکلچر فوڈ اینڈ ڈرگ اتھارٹی” (پیفڈا) قائم کی ہے۔ ملاقات میں زراعت، اریگیشن، فارمنگ، لائیو سٹاک ویلیو چین اور تعلیم کے شعبوں میں امریکی تجربات سے استفادہ کرنے پر بھی اتفاق کیا گیا۔
لاہور کے ثقافتی پس منظر کا ذکر کرتے ہوئے سینئر صوبائی وزیر نے کہا کہ لاہور میں کھیلوں اور تفریحی شعبے میں بے پناہ پوٹینشل موجود ہے۔ اس موقع پر انہوں نے امریکی قونصل جنرل کو بسنت کے تہوار پر اپنے اہل خانہ اور بچوں کے ہمراہ لاہور آنے کی خصوصی دعوت دی تاکہ وہ شہر کی شاندار ثقافتی اور روایتی سرگرمیوں سے لطف اندوز ہو سکیں۔ ملاقات کے دوران امریکی قونصل جنرل نے مریم اورنگزیب کی ساس کی طبیعت کے بارے میں بھی دریافت کیا، جبکہ سینئر وزیر نے قونصل جنرل کی آمد اور تعاون کی یقین دہانی پر ان کا شکریہ ادا کیا۔