تحریر: راجہ نورالہی عاطف
جہاں لفظ بے نقاب ہوں۔۔۔ وہیں سے سچ کا آغاز ہوتاہے
نورپور تھل کی سرزمین ہمیشہ سے دینی، تہذیبی اور روایتی اقدار کی امین رہی ہے۔ یہاں جب قرآنِ پاک کی تلاوت سے فضائیں معطر ہوتی ہیں، نعتِ رسولِ مقبول ﷺ کی صدائیں بلند ہوتی ہیں اور ننھے بچوں کے سروں پر دستارِ قرآن سجتی ہے تو یہ محض ایک تقریب نہیں رہتی بلکہ ایک ایسی روحانی ساعت بن جاتی ہے جس کی خوشبو دیر تک دل و دماغ کو معطر رکھتی ہے۔
راجہ ہاؤس نورپور تھل میں قرآنِ پاک ناظرہ مکمل کرنے والے بچوں کے اعزاز میں منعقدہ پروقار تقریب بھی اسی خوبصورت روایت کی ایک روشن کڑی تھی۔ تقریب میں علماء کرام، اساتذہ، سیاسی و سماجی شخصیات، پولیس افسران، امن کمیٹی کے ارکان اور معززینِ علاقہ کی بھرپور شرکت نے اس امر کی گواہی دی کہ قرآنِ پاک سے محبت اور نئی نسل کی دینی تربیت معاشرے کی مشترکہ ذمہ داری ہے۔
تقریب کا آغاز تلاوتِ کلامِ پاک سے ہوا۔ قاری بلال اور قاری عمیر نے قرآنِ مجید کی آیات کی تلاوت کرکے محفل کے ماحول کو نورِ قرآن سے منور کردیا۔ اس کے بعد حافظ زوہیب نے خوبصورت انداز میں منقبت پیش کی، جبکہ بارگاہِ رسالت مآب ﷺ میں نذرانۂ عقیدت پیش کرنے کی سعادت قاری عبدالمنان اور راجہ الفت حسین نے حاصل کی۔ نعتِ رسولِ اکرم ﷺ کے دوران محفل میں موجود شرکاء پر ایک روحانی کیفیت طاری ہوگئی۔
اس تقریب کی سب سے خوبصورت اور قابلِ تحسین بات وہ لمحہ تھا جب قرآنِ پاک ناظرہ مکمل کرنے والے ننھے طلبہ محمد عمر فاروق، محمد اسماعیل، محمد سعد، محمد ایان، عبدالمعز اور محمد عبداللہ کو خصوصی طور پر خراجِ تحسین پیش کیا گیا اور انہیں انعامات سے نوازا گیا۔ بچوں کے استاد مولانا ابوذر خان نے دیگر معزز مہمانوں کے ہمراہ انعامات تقسیم کیے۔
یہ بچے بلاشبہ اپنے والدین، اساتذہ اور پورے علاقے کے لیے باعثِ فخر ہیں۔ آج کے دور میں جب بچوں کی توجہ مختلف مصروفیات اور جدید ذرائع کی طرف بڑھ رہی ہے، ایسے میں قرآنِ پاک کی تعلیم مکمل کرنا یقیناً ایک عظیم کامیابی ہے۔ یہ صرف چند پاروں یا سورتوں کو پڑھ لینے کا نام نہیں بلکہ ایک ایسی بنیاد ہے جو بچے کی شخصیت، کردار اور اخلاق کو سنوارنے میں اہم کردار ادا کرتی ہے۔
تقریب کے خصوصی مہمان مولانا مفتی کامل نواز نے سیدنا حضرت محمد مصطفیٰ احمد مجتبیٰ ﷺ کی ولادتِ باسعادت کے موضوع پر سیر حاصل خطاب کیا۔ انہوں نے ذکرِ مصطفیٰ ﷺ کی برکات، عشقِ رسول ﷺ کی اہمیت اور سیرتِ طیبہ کو اپنی زندگی کا عملی نمونہ بنانے کی ضرورت پر روشنی ڈالی۔ ان کا خطاب محفل کے شرکاء کے لیے ایک روحانی اور فکری پیغام بن گیا۔
اس موقع پر مولانا وقار احمد اور مولانا ابوذر خان نے بھی بطور مہمانانِ خصوصی شرکت کی۔ تقریب میں راجہ محمد سلمان، ممبر امن کمیٹی ضلع خوشاب ڈاکٹر محمد خالد سیف اللہ بھٹی، سینئر آفیسر راجہ محمد شہزاد اکرام، ملک اظہر حسین بگہ، اے ایس آئی فرزند علی خان، حافظ نادر خان پنجاب پٹرولنگ پولیس، راجہ محمد رضوان، آفیسر محمد خالد بھٹی، سماجی شخصیت محمد حذیفہ، ٹیچرز رہنما محی الدین خان، شیر علی خان پٹھان، راجہ محمد وسیم، راجہ محمد شاہد عمران، راجہ محمد ضیغم عدنان، ملک ندیم اقبال اعوان، راجہ محمد دلاور کامران، راجہ محمد عادل، راجہ محمد فردوس، راجہ محمد عمار اور راجہ محمد سمیت دیگر معززین نے شرکت کرکے محفل کی رونق دوبالا کردی۔
یہاں یہ امر بھی قابلِ ذکر ہے کہ کسی بچے کا قرآنِ پاک مکمل کرنا دراصل ایک پورے خاندان کی خوشی ہوتی ہے۔ والدین کے لیے اس سے بڑھ کر فخر اور اطمینان کی بات کیا ہوسکتی ہے کہ ان کا بچہ اللہ تعالیٰ کی کتاب سے اپنا تعلق مضبوط کر رہا ہے۔ ایسے مواقع بچوں کے دلوں میں دین سے محبت پیدا کرنے کے ساتھ ساتھ انہیں مزید تعلیم اور عمل کی طرف بھی راغب کرتے ہیں۔
راجہ ہاؤس نورپور تھل کی یہ خوبصورت تقریب ہمیں یہ پیغام دیتی ہے کہ اگر ہم اپنی نئی نسل کو قرآنِ پاک، سیرتِ رسول ﷺ اور اعلیٰ اخلاق سے جوڑ دیں تو ہم ایک مضبوط، باکردار اور روشن معاشرہ تشکیل دے سکتے ہیں۔ ضرورت اس امر کی ہے کہ قرآنِ پاک کی تعلیم کو صرف تقریبات تک محدود نہ رکھا جائے بلکہ اسے بچوں کی روزمرہ زندگی، کردار اور معاملات کا حصہ بنایا جائے۔
قرآن سے جڑنے والا بچہ صرف ایک اچھا قاری نہیں بنتا، بلکہ وہ ایک بہتر انسان، باکردار شہری اور معاشرے کے لیے ایک روشن امید بن سکتا ہے۔
راجہ ہاؤس کی یہ محفل اسی امید کا خوبصورت استعارہ تھی—ایسے ننھے چراغوں کی محفل، جو آنے والے کل کو علمِ قرآن اور عشقِ رسول ﷺ کی روشنی سے منور کرنے کی صلاحیت رکھتے ہیں۔