مٹیاری رپورٹ عامر علی انڑ
بھٹ شاہ رورل ہیلتھ سینٹر میں مبینہ طبی غفلت کے باعث ایک خاتون اور اس کے پیٹ میں موجود بچہ جاں بحق ہو گئے۔ اطلاعات کے مطابق زچگی کے لیے لائی گئی حنا بانو کو زیادہ خون بہنے کے باوجود بروقت اور مناسب طبی امداد فراہم نہیں کی گئی، جس کے باعث اس کی حالت تشویشناک ہو گئی اور وہ اپنے بچے سمیت دم توڑ گئی۔
متوفیہ کے شوہر محرم سولنگی نے الزام عائد کرتے ہوئے کہا کہ ڈاکٹروں اور اسپتال کے عملے کی غفلت کے باعث ان کی اہلیہ اور بچہ جاں بحق ہوئے۔ انہوں نے مطالبہ کیا کہ واقعے کی شفاف تحقیقات کر کے ذمہ داروں کے خلاف قانون کے مطابق سخت کارروائی کی جائے۔
ذرائع کے مطابق متوفیہ حنا بانو ایک پرائمری اسکول میں بطور ٹیچر اپنے فرائض انجام دے رہی تھیں۔ واقعے کے بعد علاقے میں غم و غصے کی فضا پائی جاتی ہے، جبکہ متاثرہ خاندان انصاف کا مطالبہ کر رہا ہے۔
واضح رہے کہ طبی غفلت سے متعلق یہ الزامات متاثرہ خاندان کی جانب سے عائد کیے گئے ہیں، جبکہ اسپتال انتظامیہ یا محکمۂ صحت کی جانب سے تاحال اس حوالے سے کوئی باضابطہ مؤقف یا وضاحت سامنے نہیں آئی ہے۔