راولپنڈی: معرکۂ حق کو ایک سال مکمل ہونے پر پاک فوج کے شعبہ تعلقاتِ عامہ آئی ایس پی آر نے نیا ملی نغمہ "تُو یاد رکھیں” جاری کر دیا جس نے قوم کے دل جیت لیے۔ نغمہ کی ریلیز کے بعد عوام میں جوش و جذبے اور قومی فخر کی نئی لہر دوڑ گئی۔
آئی ایس پی آر کے مطابق یہ ملی نغمہ معرکۂ حق میں حاصل ہونے والی فیصلہ کن کامیابی، پاکستان کی مسلح افواج کی پیشہ ورانہ مہارت اور قوم کے غیر متزلزل عزم کی بھرپور عکاسی کرتا ہے۔ نغمہ میں دفاعِ وطن کے لیے پاکستان کی طاقت، درست حکمتِ عملی اور قومی اتحاد کو نمایاں کیا گیا ہے۔
نغمہ میں اس امر کو اجاگر کیا گیا ہے کہ مئی 2025 میں متحد قوم اور بہادر مسلح افواج نے کس طرح اپنی بے مثال مہارت اور عزم کے ذریعے دشمن کے عزائم ناکام بنائے۔ شاندار اشعار میں پاکستان کے غصے، ہمت اور غیر معمولی طاقت کو دشمن کے لیے واضح اور دوٹوک پیغام قرار دیا گیا ہے۔
ملی نغمہ میں ہر آزمائش میں سرخرو ہونے کے عزم اور دشمن کے مقابلے میں ڈٹ جانے کی ولولہ انگیز للکار بھی شامل ہے۔ معرکۂ حق کی پہلی سالگرہ کے موقع پر جاری کیا گیا یہ نغمہ قومی یکجہتی، دفاعی قوت اور حب الوطنی کی علامت بن کر سامنے آیا ہے۔
آئی ایس پی آر کے مطابق معرکۂ حق بھارت جیسے مکار دشمن کو ایک ایسا کرارا جواب تھا جسے تاریخ ہمیشہ یاد رکھے گی۔