ٹنڈوالہیار: (رپورٹ: تیمور رضا قائم خانی)
ڈپٹی کمشنر ٹنڈوالہیار نور مصطفیٰ لغاری نے ٹنڈو الہیار شہر کے مختلف علاقوں میں قائم آر او (RO) پلانٹس کا تفصیلی دورہ کیا، اس دوران متعلقہ محکموں کے افسران بھی ان کے ہمراہ موجود تھے دورے کے دوران ڈپٹی کمشنر نے طالب المولیٰ کالونی، گلشن حمید، گورنمنٹ گرلز ہائی اسکول، کمبہار پاڑہ، امان اللہ شاہ کالونی، راما پیر مندر، میمن سوسائٹی اور دیگر علاقوں میں قائم آر او پلانٹس کا معائنہ کیا اور ان کی موجودہ صورتحال کا جائزہ لیا۔ اس موقع پر متعلقہ محکموں کے افسران نے انہیں آر او پلانٹس کے حوالے سے تفصیلی بریفنگ دی۔اس موقع پر گفتگو کرتے ہوئے ڈپٹی کمشنر نور مصطفیٰ لغاری نے متعلقہ افسران کو سخت ہدایت کی کہ آر او پلانٹس کی باقاعدہ دیکھ بھال اور فعالیت کو ہر صورت یقینی بنایا جائے تاکہ عوام کو صاف پینے کے پانی کی فراہمی میں کسی قسم کی دشواری کا سامنا نہ کرنا پڑے۔ انہوں نے مزید ہدایت کی کہ پلانٹس کی مسلسل نگرانی کے لیے مؤثر اقدامات کیے جائیں تاکہ شہریوں کو صاف پینے کے پانی کی فراہمی کا سلسلہ بلاتعطل جاری رہے۔