لاہور: ماڈل ٹاؤن پارک کے قریب آن لائن ‘موت سپلائر’ کے خلاف بڑی کارروائی، منشیات کی بھاری کھیپ برآمد

لاہور :ماڈل ٹاؤن پولیس نے منشیات فروشوں کے خلاف جاری کریک ڈاؤن کے دوران ایک بڑی کامیابی حاصل کرتے ہوئے، سینٹرل پبلک پارک کے قریب سے بھاری مقدار میں افیون اور چرس برآمد کر کے ملزم کو رنگے ہاتھوں گرفتار کر لیا ہے۔
ایس پی ماڈل ٹاؤن اسد علی کے مطابق، پولیس کو خفیہ اطلاع موصول ہوئی تھی کہ ایک مشکوک شخص منشیات کی بڑی کھیپ منتقل کرنے کی کوشش کر رہا ہے۔ اس اطلاع پر پولیس ٹیم نے فوری کارروائی کرتے ہوئے سینٹرل پبلک پارک کے قریب چھاپہ مارا اور ملزم ابوذر کو حراست میں لے لیا۔
دورانِ تلاشی ملزم کے قبضے سے ایک توڑا برآمد ہوا جس میں چارکلوگرام اعلی افیون اور پانچ کلوگرام چرس گردا برآمد کی گئی ۔
ایس پی اسد علی نے بتایا کہ ملزم "علاقہ غیر” سے منشیات منگوا کر لاہور کے مختلف پوش علاقوں میں سپلائی کرتا تھا۔ ملزم انتہائی شاطر ہے اور آن لائن آرڈر پر مطلوبہ لوکیشن پر منشیات پہنچانے کا کام کر رہا تھا۔ گرفتاری کے وقت بھی ملزم ایک بڑے آرڈر کی ڈیلیوری کے لیے پارک کے قریب موجود تھا۔
پولیس نے ملزم ابوذر کے خلاف مقدمہ درج کر کے تفتیش کا آغاز کر دیا ہے تاکہ اس نیٹ ورک سے جڑے دیگر افراد تک پہنچا جا سکے۔
اس موقع پر ایس پی ماڈل ٹاؤن اسد علی کا کہنا تھاکہ”منشیات فروش ہماری نسلوں کے دشمن ہیں۔ شہر کو اس ناسور سے پاک کرنے کے لیے انٹیلی جنس بیسڈ کارروائیاں پوری قوت سے جاری رہیں گی اور کسی بھی رعایت کے بغیر قانون کی گرفت میں لایا جائے گا۔