بلوچستان (رحمت اللہ بلوچ، بیورو چیف بے نقاب نیوز)
مکران کی مٹی، سمندر کی خوشبو اور بزرگوں کی صدیوں پرانی دانائی کا حسین امتزاج سمجھی جانے والی روایتی خوراک ’گور مچھلی کی لاندی‘ آج بھی ساحلی علاقوں کی تہذیب اور شناخت کا ایک اہم ستون ہے۔
مقامی افراد کے مطابق گور مچھلی کی لاندی محض ایک نمکین پکوان نہیں، بلکہ اُس قدیم دور کی زندہ یادگار ہے جب جدید سہولیات کی عدم موجودگی میں گوادر کے ماہی گیر سمندر کی نعمتوں کو طویل عرصے تک محفوظ رکھنے کے لیے اپنے روایتی طریقے اور تجربات استعمال کرتے تھے۔
اہلِ علاقہ کا کہنا ہے کہ آج بھی اس قدیم اور منفرد روایت کو نئی نسل کے سامنے زندہ رکھا جا رہا ہے، کیونکہ بعض ذائقے وقت گزرنے کے ساتھ پرانے نہیں ہوتے بلکہ کسی بھی خطے کی پہچان بن جاتے ہیں۔ مکران کے باسیوں کے نزدیک یہ محض ایک ذائقہ نہیں بلکہ خطے کی تاریخ کا ایک روشن باب ہے۔