تحریر: نفیس احمد آرائیں
جہاں لفظ بے نقاب ہوں۔۔۔ وہیں سے سچ کا آغاز ہوتاہے
پاکستان 14 اگست 1947ء کو لاکھوں مسلمانوں کی قربانیوں کے نتیجے میں معرضِ وجود میں آیا۔ بانیٔ پاکستان قائداعظم محمد علی جناح نے ایک ایسی ریاست کا خواب دیکھا تھا جہاں ہر شہری کو مساوی حقوق، انصاف، تعلیم، روزگار اور عزت کے ساتھ زندگی گزارنے کے مواقع حاصل ہوں۔ مگر افسوس کہ آزادی کے تقریباً 79 سال گزرنے کے باوجود عام پاکستانی آج بھی بنیادی ضروریاتِ زندگی کے لیے جدوجہد کر رہا ہے۔
پاکستان نے ان برسوں میں ایٹمی طاقت بننے، موٹرویز، ڈیموں، صنعتوں، تعلیمی اداروں اور مواصلاتی نظام کی ترقی سمیت کئی اہم کامیابیاں حاصل کیں، لیکن دوسری طرف سیاسی عدم استحکام، کرپشن، قرضوں، بے روزگاری، مہنگائی، غربت اور طبقاتی تقسیم نے ملک کی بنیادوں کو کمزور کیا۔
قیامِ پاکستان کے بعد ملک نے جمہوری اور فوجی دونوں ادوار دیکھے۔ مختلف حکومتیں آئیں، وعدے کیے گئے، ترقیاتی منصوبوں کے اعلانات ہوئے، مگر عوام کے بنیادی مسائل مکمل طور پر حل نہ ہوسکے۔ کبھی مارشل لا، کبھی سیاسی محاذ آرائی اور کبھی معاشی بحران نے ملک کو ترقی کی منزل سے دور رکھا۔ 1971ء میں مشرقی پاکستان کی علیحدگی ہماری سیاسی اور قومی تاریخ کا ایک بڑا سانحہ ثابت ہوئی۔
آج صورتحال یہ ہے کہ ایک عام مزدور کی آمدنی گھر کا خرچ پورا کرنے سے قاصر ہے، والدین بچوں کی تعلیم اور علاج کے لیے پریشان ہیں، نوجوان روزگار کی تلاش میں مارے مارے پھر رہے ہیں اور کسان اپنی فصل کی مناسب قیمت کے لیے جدوجہد کر رہا ہے۔ بجلی، گیس، پیٹرول، آٹا اور ادویات کی بڑھتی قیمتوں نے متوسط طبقے کو بھی شدید دباؤ میں ڈال دیا ہے۔
دوسری طرف ملک کے بااثر سیاسی، کاروباری اور مراعات یافتہ طبقوں کے پاس دولت، جائیدادوں اور وسائل کے وسیع مواقع موجود ہیں۔ سوال یہ ہے کہ قومی وسائل سے فائدہ اٹھانے کا حق صرف طاقتور طبقے تک محدود کیوں نظر آتا ہے؟ عام شہری ٹیکس ادا کرے، قربانیاں دے اور پھر بھی تعلیم، صحت، روزگار اور انصاف سے محروم رہے، تو یہ صورتحال لمحۂ فکریہ ہے۔
پاکستان کی بدقسمتی صرف وسائل کی کمی نہیں بلکہ وسائل کی غیر منصفانہ تقسیم، کمزور احتساب، ناقص منصوبہ بندی اور عوامی مفاد کو ترجیح نہ دینا بھی ہے۔ ہمیں ایسے نظام کی ضرورت ہے جہاں قانون امیر اور غریب دونوں کے لیے برابر ہو، حکمران جواب دہ ہوں اور قومی خزانے کو عوام کی امانت سمجھا جائے۔
آج حکمرانوں اور سیاست دانوں سے ایک بنیادی سوال ہے: کیا پاکستان صرف اقتدار حاصل کرنے کے لیے بنایا گیا تھا یا اس کے کروڑوں عوام کو بہتر زندگی دینے کے لیے بھی؟
پاکستان کی حقیقی ترقی بلند عمارتوں، بڑی گاڑیوں اور موٹرویز سے نہیں بلکہ اس دن نظر آئے گی جب غریب کو دو وقت کی روٹی، معیاری تعلیم، مفت یا قابلِ برداشت علاج، باعزت روزگار اور فوری انصاف میسر ہوگا۔
پاکستان کسی ایک جماعت، خاندان یا طبقے کی جاگیر نہیں، یہ 25 کروڑ سے زائد عوام کی مشترکہ امانت ہے۔ اب وقت آگیا ہے کہ حکمران عوام پر حکمرانی کرنے کے بجائے عوام کی خدمت کو اپنا فرض سمجھیں۔
پاکستان زندہ باد!