سیالکوٹ (سلیم احمد اعوان شیخو)
ڈپٹی کمشنر سیالکوٹ اویس مشتاق کی خصوصی ہدایات پر، انچارج پیرا فورس سیالکوٹ ناصر محمود ججہ کی نگرانی میں فروٹ منڈی سیالکوٹ میں تجاوزات کے خلاف بھرپور آپریشن کیا گیا۔ اس کارروائی کے دوران منڈی کے راستوں میں رکاوٹ بننے والی تجاوزات کو ہٹا کر آمدورفت کے لیے راستہ مکمل طور پر کلیئر کروا دیا گیا۔آپریشن کے دوران سڑک پر فروٹ فروخت کرنے والے دکانداروں کو اپنا سامان پیچھے منتقل کرنے کی ہدایت کی گئی، جبکہ دکانوں کے باہر رکھا گیا اضافی سامان بھی ہٹوا دیا گیا جو راستے کی تنگی اور آمدورفت میں رکاوٹ کا باعث بن رہا تھا۔انتظامیہ کے مطابق اس آپریشن کا بنیادی مقصد فروٹ منڈی میں ٹریفک کی روانی برقرار رکھنا، شہریوں اور خریداروں کو آمدورفت میں درپیش مشکلات کا خاتمہ اور منڈی کے راستوں کو تجاوزات سے پاک بنانا ہے۔ ڈپٹی کمشنر سیالکوٹ اویس مشتاق کے واضح احکامات کے مطابق شہر میں تجاوزات کے خاتمے اور عوام کو بہتر شہری سہولیات کی فراہمی کے لیے ایسی کارروائیاں جاری رہیں گی۔آخر میں تمام دکانداروں اور فروٹ فروشوں کو سخت ہدایت کی گئی ہے کہ وہ اپنی مقررہ حدود کے اندر رہ کر کاروبار کریں اور عوامی راستوں پر سامان رکھ کر آمدورفت میں رکاوٹ پیدا کرنے سے گریز کریں۔