ایمازون کا تاریخی قدم: پہلی بار اینڈرائیڈ اور ‘الیکسا پلس’ سے لیس مہنگے ٹیبلٹس متعارف

کیلے فورنیا :ٹیکنالوجی کی دنیا کی معروف ترین کمپنی ’ایمازون‘ نے اپنے روایتی سستے ماڈلز سے ہٹ کر پہلی بار ایسے جدید ٹیبلٹس متعارف کرا دیے ہیں جو گوگل کے خالص ’اینڈرائیڈ آپریٹنگ سسٹم‘ پر کام کریں گے اور جن میں کمپنی کا جدید ترین اے آئی وائس اسسٹنٹ ’الیکسا پلس‘ بھی شامل ہوگا۔
غیر ملکی خبر رساں ادارے کے مطابق، سان فرانسسکو میں منعقدہ ایک تقریب میں پیش کیے گئے ان نئے ’الیکسا ٹیبلٹس‘ کی قیمتیں 230 ڈالر سے شروع ہو کر 500 ڈالر تک ہیں، جبکہ ان کا سب سے اعلیٰ اور مہنگا ماڈل 550 ڈالر میں فروخت کے لیے پیش کیا گیا ہے۔ سابقہ فائر ٹیبلٹس کی پلاسٹک باڈی کے برعکس ان تمام نئے ماڈلز کو پائیدار اور دیدہ زیب ایلومینیم باڈی کے ساتھ تیار کیا گیا ہے۔
ایمازون کا یہ 550 ڈالر والا (128 جی بی اسٹوریج کا حامل) اعلیٰ ترین ماڈل براہ راست ایپل کے 450 ڈالر کے ’آئی پیڈ‘ اور سام سنگ کے 550 ڈالر کے ’گلیکسی ٹیبلٹ‘ کو کڑے مقابلے میں لانے کے لیے ڈیزائن کیا گیا ہے۔ اس سے قبل ایمازون کا سب سے مہنگا فائر ایچ ڈی 10 ٹیبلٹ تقریباً 180 ڈالر تک دستیاب ہوتا تھا (جس پر کمپنی اکثر تخفیف بھی دیتی تھی)۔
کٹی ہاک کوڈ نام اور اینڈرائیڈ پر منتقلی
رپورٹس کے مطابق، ان ٹیبلٹس کو اندرونی طور پر ’کٹی ہاک‘ کے کوڈ نام سے تیار کیا گیا تھا۔ اس بار ایمازون نے اپنے روایتی فائر او ایس (Fire OS) کو چھوڑ کر براہ راست اینڈرائیڈ کو اپنا لیا ہے، جو کہ دراصل فائر او ایس کا ہی ایک ترمیم شدہ روپ تھا۔ اس تبدیلی سے صارفین کو اب محدود فائر او ایس ایپ اسٹور کی بجائے گوگل کے وسیع تر ایکو سسٹم اور سہولیات تک رسائی حاصل ہوگی۔
ایمازون کے ڈیوائسز کے سربراہ پینوس پانے کی قیادت میں یہ تبدیلی واضح کرتی ہے کہ کمپنی اب سستے اور کم مارجن والے آلات سے نکل کر پریمیم اور مہچی قیمت والی مصنوعات کی مارکیٹ میں اپنے قدم مضبوط کرنا چاہتی ہے۔ ماضی میں ایمازون کم قیمت پر ٹیبلٹس فروخت کرکے صارفین کو اپنی پرائم ویڈیو، کنڈل، اور ای کامرس خدمات سے منسلک کرتا تھا، تاہم اس حکمت عملی میں اسکرین کے معیار اور بیٹری لائف پر کچھ سمجھوتے کرنے پڑتے تھے۔
نئے ڈیوائسز کا سب سے بڑا خاصہ ’الیکسا پلس‘ ہے، جو کہ مصنوعی ذہانت (AI) سے لیس ایک جدید وائس اسسٹنٹ ہے۔ یہ صارفین کی پیچیدہ آواز پر نہ صرف سوالات کے درست جوابات دے گا بلکہ مختلف عملی کام بھی انجام دے سکے گا۔ البتہ، الیکسا پلس کی مکمل سہولت سے فائدہ اٹھانے کے لیے صارفین کو پرائم ممبرشپ یا ایک الگ ماہانہ/سالانہ سبسکرپشن لینا ہوگی۔
مارکیٹ ریسرچ فرم ’آئی ڈی سی‘ کے مطابق، رواں سال کی دوسری سہ ماہی میں عالمی سطح پر ٹیبلٹس کی مجموعی فروخت میں 12 فیصد کمی واقع ہوئی ہے اور یہ تین کروڑ 36 لاکھ یونٹس تک محدود رہ گئے ہیں۔ صرف امریکہ میں اس مدت کے دوران فروخت میں 32 فیصد کی بڑی گراوٹ دیکھی گئی۔ عالمی مارکیٹ میں اس وقت ایمازون کا حصہ سکڑ کر صرف 1.9 فیصد رہ گیا ہے، جبکہ ایپل 34 فیصد کے ساتھ پہلے اور سام سنگ 17.5 فیصد کے ساتھ دوسرے نمبر پر براجمان ہیں۔
دیگر تفصیلات کے مطابق، ان نئے ٹیبلٹس کی قیمت میں لاک اسکرین پر اشتہارات بند کرنے کی فیس شامل نہیں ہے۔ اشتہارات سے جان چھڑانے کے لیے صارفین کو مزید 20 ڈالر کی یکمشت رقم ادا کرنا ہوگی (جو کہ پرانے فائر ٹیبلٹس کی 15 ڈالر فیس سے زیادہ ہے)، البتہ سب سے مہنگے ماڈل میں اشتہارات نہیں ہوں گے۔ ایمازون کا کہنا ہے کہ پرانے فائر او ایس ٹیبلٹس بدستور کام کرتے رہیں گے، تاہم کمپنی نے یہ واضح نہیں کیا کہ آیا وہ مستقبل میں پرانے سافٹ ویئر اور اس کے ایپ اسٹور کی باقاعدہ دیکھ بھال جاری رکھے گی یا نہیں۔