چنیوٹ (فرحان بلال سے)
جی سی یونیورسٹی چنیوٹ کیمپس میں 12 ربیع الاول کے سلسلہ میں سیرت النبی ﷺ سیمینار کا انعقاد کیا گیا، جس میں ڈپٹی کمشنر عائشہ رضوان، ڈی پی او ڈاکٹر نوید عاطف، ڈائریکٹر جی سی یونیورسٹی چنیوٹ کیمپس ڈاکٹر فلک شیر سمیت اساتذہ کرام، طلباء و طالبات اور دیگر معززین نے شرکت کی۔سیرت النبی ﷺ سیمینار کا آغاز تلاوتِ کلامِ پاک سے ہوا۔ طلباء و طالبات نے بارگاہِ رسالت ﷺ میں نعت رسولِ مقبول ﷺ پیش کرتے ہوئے گلہائے عقیدت کے پھول نچھاور کیے۔ اس موقع پر طلباء و طالبات نے سیرت النبی ﷺ اور حیاتِ طیبہ کے مختلف پہلوؤں پر تقاریر بھی پیش کیں، جنہیں شرکاء نے بے حد سراہا۔ بعد ازاں حضور نبی کریم ﷺ کی ولادتِ باسعادت کی خوشی میں کیک بھی کاٹا گیا۔سیمینار سے خطاب کرتے ہوئے ڈپٹی کمشنر عائشہ رضوان نے کہا کہ نبی کریم حضرت محمد مصطفیٰ ﷺ کی سیرتِ طیبہ ہمارے لیے مکمل ضابطۂ حیات ہے۔ آپ ﷺ نے انسانیت کو محبت، امن، بھائی چارے، عدل و انصاف، برداشت اور حسنِ اخلاق کا درس دیا۔ ہمیں چاہیے کہ ہم اپنی عملی زندگی میں حضور اکرم ﷺ کی تعلیمات اور اسوۂ حسنہ کو اپنائیں۔ڈی پی او ڈاکٹر نوید عاطف نے کہا کہ نبی کریم ﷺ کی سیرتِ مبارکہ انسانیت کے لیے مشعلِ راہ ہے۔ آپ ﷺ نے معاشرے میں امن، مساوات، رواداری اور احترامِ انسانیت کو فروغ دیا۔ نوجوان نسل کو چاہیے کہ وہ سیرت النبی ﷺ کا مطالعہ کرے اور اپنی زندگیوں کو حضور اکرم ﷺ کی تعلیمات کے مطابق ڈھالے۔ڈائریکٹر جی سی یونیورسٹی چنیوٹ کیمپس ڈاکٹر فلک شیر نے کہا کہ ایسے سیمینارز کے انعقاد کا مقصد طلباء و طالبات کو سیرت النبی ﷺ اور اسلامی اقدار سے روشناس کرانا ہے۔ نئی نسل اگر حضور اکرم ﷺ کے اسوۂ حسنہ کو اپنا لے تو معاشرے میں مثبت تبدیلی لائی جا سکتی ہے۔سیمینار کے اختتام پر ملک و قوم کی سلامتی، ترقی، خوشحالی اور امتِ مسلمہ کے اتحاد کے لیے خصوصی دعا بھی کی گئی