خوشاب/سرگودھا (راجہ نورالہی عاطف سے)
جشن عید میلاد النبی ﷺ کے حوالے سے کمشنر دفتر سرگودھا میں محفل میلاد النبیﷺ کا انعقاد کیا گیا۔ روح پرور محفل میں کمشنر سرگودھا ڈویژن حافظ شوکت علی، ڈپٹی کمشنر حسین احمد رضا چودھری، ایڈیشنل کمشنر ریونیو سیف اللہ ساجد، ایڈیشنل کمشنر کوآرڈینیشن اشفاق الرحمان،ایڈیشنل ڈپٹی کمشنر ریوینو خاور بشیر احمد ، ایڈیشنل ڈپٹی کمشنر ہیڈ کوارٹر احمد مغیث اور ڈائریکٹر ڈویلپمنٹ و ڈائریکٹر لوکل گورنمنٹ آصف اقبال ملک سمیت کمشنر اور ڈپٹی کمشنر دفاتر کے افسران اور ملازمین نے شرکت کی۔ پرنورمحفل کا آغاز لا آفیسر حافظ آفتاب احمد کی تلاوت کلام پاک سے ہوا۔ محمد مغیث شاہد، قاری محمد عصمت اللہ عطاری اور دیگر نعت خواں حضرات نے بارگاہ رسالت مآب ﷺ میں عقیدت کے پھول نچھاور کیے اور حضور اکرم ﷺ کی شان اقدس میں نعتیہ کلام پیش کیا۔ اس موقع پر کمشنر سرگودھا حافظ شوکت علی کا نعتیہ کلام بھی نعت خواں حضرات نے خوبصورت انداز میں پیش کیا، جس سے محفل کا روحانی ماحول مزید پُرنور ہوگیا۔ مفتی نوید احمد سبحانی نے سیرت النبی ﷺ کے مختلف روشن پہلوؤں پر ایمان افروز بیان کرتے ہوئے کہا کہ حضور نبی کریم ﷺ کی حیات طیبہ پوری انسانیت کے لیے بہترین نمونہ ہے۔ آپ ﷺ کی تعلیمات محبت، اخوت، برداشت، عدل، رواداری اور انسانیت کی خدمت کا درس دیتی ہیں۔ ہمیں اپنی عملی زندگی میں سیرت النبی ﷺ کے سنہری اصولوں کو اپنانا چاہیے۔ بعد ازاں شاہد لطیف اعوان نے صلوٰۃ و سلام پیش کیا۔ شرکاء نے انتہائی عقیدت و احترام کے ساتھ بارگاہ رسالت مآب ﷺ میں حاضری پیش کی۔ اس موقع پر ملکی ترقی، خوشحالی، امن و سلامتی اور امت مسلمہ کے اتحاد کے لیے خصوصی دعا بھی کی گئی۔ محفل میں نقابت کے فرائض شاہد لطیف اعوان نے ادا کیے۔