اسلام آباد: (حاجی شفیق کی رپورٹ)
اسلام آباد پولیس نے جرائم پیشہ عناصر کے خلاف کارروائیوں اور شہریوں کے تحفظ کے لیے وفاقی دارالحکومت کے مختلف علاقوں میں گرینڈ کومبنگ سرچ آپریشنز کا سلسلہ تیز کر دیا۔ آئی جی اسلام آباد علی ناصر رضوی کے احکامات پر ماہِ اگست کے دوران مختلف علاقوں میں 145 گرینڈ سرچ آپریشنز کیے گئے۔ پولیس کے مطابق ان کارروائیوں کے دوران 9,317 افراد اور 3,993 گھرانوں کی چیکنگ کی گئی۔ سرچ آپریشنز کے دوران 274 ہوٹلز، 1,027 دکانوں، 4,908 موٹرسائیکلوں اور 1,720 گاڑیوں کی بھی جانچ پڑتال کی گئی۔ مزید تفتیش اور جانچ کے لیے 251 مشکوک افراد، 453 موٹرسائیکلیں اور 5 گاڑیاں متعلقہ تھانوں منتقل کی گئیں۔
پولیس کے مطابق کارروائیوں کے دوران منشیات اور غیر قانونی اسلحہ رکھنے والے 4 ملزمان کو گرفتار کیا گیا، جن کے قبضے سے آئس، خنجر، 3 پستول اور ایمونیشن برآمد ہوا۔
اسلام آباد پولیس کا کہنا ہے کہ شہریوں کے جان و مال کے تحفظ اور جرائم پیشہ عناصر کی سرکوبی کے لیے پٹرولنگ یونٹس اور خصوصی سکواڈز شہر بھر میں مسلسل گشت کر رہے ہیں۔
