گرل فرینڈ کی تعریف اور ساتھی کھلاڑیوں کے دلچسپ تبصرے، یادگار لمبے بالوں کا باب تمام
مانچسٹر :مانچسٹر سٹی کے گول مشین اسٹار اسٹرائیکر ارلنگ ہالینڈ (Erling Haaland) نے پریمیئر لیگ کے نئے سیزن کے آغاز سے ٹھیک پہلے اپنے روایتی اور منفرد انداز کو مکمل طور پر تبدیل کر کے مداحوں کو حیرت میں ڈال دیا ہے۔
ہالینڈ نے اپنے مشہورِ زمانہ لمبے سنہرے بال کٹوا کر ایک بالکل نیا ملٹری اسٹائل ’بز کٹ‘ (Buzz Cut) اپنا لیا ہے، جس کی ویڈیو انہوں نے سوشل میڈیا اور یوٹیوب پر بھی شیئر کی ہے۔
Monday mood ◽️◾️ pic.twitter.com/aLzzAOb9iE
— Erling Haaland (@Erling) August 24, 2026
اپنے اس نئے لُک کے حوالے سے بات کرتے ہوئے ہالینڈ نے انکشاف کیا کہ وہ دراصل 2026 کے ورلڈ کپ کے فوراً بعد ہی بال کٹوانا چاہتے تھے، لیکن مصروفیات کی وجہ سے ایسا ممکن نہ ہو سکا۔ انہوں نے کہا، "سیزن اب شروع ہو چکا ہے، اس لیے ایک تازہ شروعات (Fresh Start) کرنے کا یہ بہترین وقت تھا۔”
ہالینڈ کے لمبے بالوں کے پیچھے کئی کہانیاں
ہالینڈ کا یہ نیا لُک جتنا چونکا دینے والا تھا، اتنی ہی دلچسپ اس کے پیچھے کی کہانیاں ہیں۔ اسٹار فٹبالر نے بتایا کہ سویڈن کے لیجنڈری کھلاڑی زاتان ابراہیمعوچ (Zlatan Ibrahimović) نے ماضی میں انہیں خبردار کرتے ہوئے کہا تھا کہ "کبھی اپنے بال مت کاٹنا کیونکہ تمہاری ساری طاقت انہی بالوں میں پوشیدہ ہے!” زاتان کے اس جملے نے ہالینڈ کو تھوڑا سا تذبذب میں ضرور ڈالا تھا، تاہم انہوں نے پھر بھی بال کٹوانے کا فیصلہ کیا۔ بعد ازاں زاتان نے بھی اس نئے لُک پر طنزیہ تبصرہ کرتے ہوئے پوچھا کہ کیا ہالینڈ کوئی شرط ہار گئے تھے؟
دوسری جانب، جب ہالینڈ نے پہلی بار یہ لُک اپنی گرل فرینڈ ازابیل ہاوگسنگ جوہانسن (Isabel Haugseng Johansen) کو دکھایا تو وہ شدید صدمے سے دوچار ہوئیں اور ان کے منہ سے بے ساختہ نکلا، "اوہ مائی گاڈ!” تاہم بعد میں انہوں نے نئے لُک کی تعریف کرتے ہوئے اسے زبردست اور ٹف قرار دیا۔ مانچسٹر سٹی کے کوچ پیپ جووارڈیا (Pep Guardiola) نے بھی اس پر ہلکے پھلکے انداز میں تبصرہ کرتے ہوئے مذاقاً کہا کہ ہالینڈ خوش قسمت ہیں کہ ان کے پاس بال موجود ہیں۔
یاد رہے کہ ہالینڈ نے یہی لمبے بال اپنے کیریئر کے یادگار ترین لمحات میں رکھے تھے، جن میں مانچسٹر سٹی کا 2022-23 کا تاریخی ’ٹریبل‘ (پریمیئر لیگ، ایف اے کپ اور چیمپئنز لیگ کی فتوحات) بھی شامل ہے۔ اب دیکھنا یہ ہے کہ یہ نیا ملٹری کٹ والا روپ میدان میں ان کی گول اسکورنگ فارم پر کیسا اثر انداز ہوتا ہے!