دیر بالا (بیورو چیف ریاض ابوالخیل) ۔
دیر بالا: ڈسٹرکٹ پولیس آفیسر دیر بالا اسلم نواز کی خصوصی ہدایات پر حالیہ سیکیورٹی صورتحال کے پیش نظر ضلع بھر میں امن و امان کے قیام اور عوام کے جان و مال کے تحفظ کے لیے وسیع پیمانے پر سرچ اینڈ سٹرائیک آپریشنز اور ناکہ بندیوں کا سلسلہ جاری ہے۔
مختلف علاقوں میں جاری کارروائیوں میں سرکل ایس ڈی پی اوز، ایس ایچ اوز، ایلیٹ فورس، سی ٹی ڈی اور دیگر پولیس نفری نے بھرپور حصہ لیا۔ سرچ آپریشنز کے دوران حساس مقامات، مشکوک افراد اور جرائم پیشہ عناصر کے خلاف مؤثر کارروائیاں عمل میں لائی گئیں، جبکہ اشتہاری و مطلوب ملزمان کے گھروں پر قانونی تقاضوں کے مطابق چھاپے بھی مارے گئے۔
پولیس کی جانب سے مختلف مقامات پر ناکہ بندیاں قائم کرکے مشکوک افراد اور گاڑیوں کی چیکنگ بھی کی گئی، جبکہ علاقے میں امن و امان کی صورتحال کو مزید مؤثر بنانے کے لیے پولیس گشت اور نگرانی کا عمل بھی جاری ہے۔
اس موقع پر پولیس افسران نے علاقہ مشران سے ملاقاتیں کرتے ہوئے انہیں موجودہ سیکیورٹی صورتحال کے حوالے سے ہدایت کی کہ کسی بھی مشکوک، اجنبی شخص یا مشتبہ سرگرمی کی فوری اطلاع متعلقہ پولیس اسٹیشن یا کنٹرول روم دیر بالا کے نمبر 0944880493 پر دیں۔
علاقہ مشران نے دیر بالا پولیس کے ساتھ مکمل تعاون کی یقین دہانی کراتے ہوئے قیام امن کے لیے پولیس کے ساتھ ہر ممکن تعاون جاری رکھنے کے عزم کا اظہار کیا۔
دیر بالا پولیس عوام کے جان و مال کے تحفظ، امن و امان کے قیام اور سماج دشمن عناصر کے خلاف بلاامتیاز کارروائی کے لیے ہمہ وقت مصروف عمل ہے۔
