اسلام آباد مذاکرات، وزیراعظم شہباز شریف اور امریکی نائب صدر جے ڈی وینس میں اہم ملاقات

اسلام آباد :اسلام آباد میں وزیراعظم شہباز شریف اور امریکی نائب صدر جے ڈی وینس کے درمیان ملاقات ہوئی ہے۔
وزیراعظم ہاؤس کے مطابق ملاقات میں وزیراعظم نے ایران اور امریکہ کے درمیان مذاکرات کے حوالے سے بات کرتے ہوئے اس امید کا اظہار کیا کہ یہ بات چیت خطے میں پائیدار امن کی جانب سنگ میل ثابت ہو گی۔مذاکرات میں دونوں وفود کے مثبت اور تعمیری رویے کی تعریف کرتے ہوئے وزیراعظم نے اس عزم کا اعادہ بھی کیا کہ پاکستان خطے میں دیرپا امن کے حصول کے لیے دونوں فریقین کے درمیان اپنا سہولت کاری کا کردار جاری رکھنے کا خواہاں ہے۔
اس سے پہلے وزیراعظم شہباز شریف نے جمعے کو قوم سے خطاب میں مذاکرات کو انتہائی اہم قرار دیتے ہوئے ’میک آر بریک‘ کے الفاظ استعمال کیے اور امید بھی ظاہر کہ اس سے خطے کو استحکام کی طرف لے جانے میں مدد ملے گی۔