سابق کلکٹر کسٹمز سمیت مزید 5 ملزم گرفتار ، 214 کلو چوری شدہ چاندی اور 49 لاکھ برآمد

بلوچستان رحمت اللہ بلوچ بیوروچیف بے نقاب نیوز) 400 کلو چاندی چوری کیس میں سابق کلکٹر کسٹمز سمیت مزید 5 ملزمان گرفتار ، 214 کلو چوری شدہ چاندی اور 49 لاکھ برآمد
وفاقی تحقیقاتی ادارے (ایف آئی اے) نے 400 کلو چاندی چوری کیس میں سابق کلکٹر کسٹمز سمیت مزید 5 ملزمان کو گرفتار کر لیا ہے۔
گرفتار ملزمان میں سابق کلکٹر کسٹمز ڈاکٹر کرم الٰہی بھی شامل ہیں۔ ملزمان کے قبضے سے 214 کلو چوری شدہ چاندی اور 49 لاکھ روپے نقد رقم برآمد کر لی گئی ہے۔
ایف آئی اے ترجمان کے مطابق، محکمہ کسٹمز میں رواں سال اپریل میں 400 کلو چاندی کو سیسے سے تبدیل کرنے کا سنسنی خیز معاملہ سامنے آیا تھا۔ ایف آئی اے کی تکنیکی ٹیم نے جدید ڈیجیٹل فرانزک اور انٹیلی جنس کی مدد سے کیس کی تحقیقات کیں، جس کے بعد چاندی کی چوری اور اسمگلنگ کا مقدمہ درج کیا گیا۔ درج مقدمے کے مطابق، خالص چاندی کے ایک کلو کے بسکٹس کو سیسے کے جعلی بسکٹس سے تبدیل کیا گیا تھا۔ترجمان ایف آئی اے نے مزید بتایا کہ 400 کلو چاندی چوری کیس میں سابق کلکٹر کسٹمز ڈاکٹر کرم الٰہی سمیت مزید 5 ملزمان کو گرفتار کیا گیا ہے، جبکہ اس کیس میں 2 پریونٹیو افسران کو پہلے ہی گرفتار کیا جا چکا تھا۔
گرفتار ملزمان کا جسمانی ریمانڈ حاصل کر لیا گیا ہے، جبکہ کیس میں نامزد 2 انسپکٹرز سمیت دیگر مفرور ملزمان کی گرفتاری کے لیے کارروائیاں جاری ہیں۔