امریکا میں پراسرار بیماری کا پھیلاؤ: ہزاروں شہری متاثر، حکام نے سر پکڑ لئے، تحقیقات شروع

واشنگٹن:امریکا بھر میں ایک ایسے پراسرار طفیلی (Parasite) نے تشویشناک صورتحال پیدا کر دی ہے جو شدید قسم کے اسہال (Explosive Diarrhea) کا سبب بن رہا ہے۔ ہیلتھ حکام ابھی تک اس بیماری کے اصل ماخذ کا پتہ لگانے میں مصروف ہیں، تاہم اس دوران مشہور فوڈ چین ‘ٹاکو بیل’ پر حکام کی نظریں مرکوز ہو گئی ہیں۔
ڈیٹرائٹ کے علاقے میں ٹاکو بیل کے کئی ریستورانوں نے اپنے دروازوں پر نوٹس آویزاں کر دیے ہیں کہ وہ فی الحال لیٹس (سلاد کے پتے)، پیاز، پیکو اور گواکامول (Guacamole) پیش نہیں کر سکتے۔ وفاقی اور ریاستی حکام اس بات کی تحقیقات کر رہے ہیں کہ آیا یہ انفیکشن ٹاکو بیل کے کسی مخصوص ریستوران سے تو نہیں پھیلا۔ ٹاکو بیل انتظامیہ کا کہنا ہے کہ ابھی تک کسی بھی لنک کی تصدیق نہیں ہوئی ہے، لیکن احتیاط کے طور پر انہوں نے کچھ منتخب ریستورانوں سے یہ اجزاء عارضی طور پر ہٹا دیے ہیں۔
امریکی ادارہ برائے انسدادِ امراض (CDC) کے مطابق، ملک بھر میں تقریباً 7,000 افراد اس بیماری (‘سائیکلو سپوریاسس’) سے متاثر ہو سکتے ہیں۔ ریاست مشی گن میں صورتحال سب سے زیادہ سنگین ہے، جہاں اب تک 3,309 کیسز کی تصدیق ہو چکی ہے، جو ریاست کی تاریخ میں اس وائرس کا سب سے بڑا پھیلاؤ ہے۔ تفتیشی حکام کا گمان ہے کہ اس بیماری کا پھیلاؤ آلودہ سلاد یا لیٹس کے پتوں کے ذریعے ہوا ہے۔
صحت کے ماہرین عوام کو مشورہ دے رہے ہیں کہ وہ اس بیماری کی علامات پر کڑی نظر رکھیں اور اگر شدید اسہال یا پیٹ کے مسائل کا سامنا ہو تو فوری طور پر طبی امداد حاصل کریں۔ حکام اس بات کا تعین کرنے کے لیے دن رات کام کر رہے ہیں کہ یہ طفیلی آخر کہاں سے آ رہا ہے اور اس کا سپلائی چین سے کیا تعلق ہے۔