سانگھڑ:( بیورو چیف )
ضلع بھر میں محرم الحرام کے دوران امن و امان برقرار رکھنے کے لیے جامع سیکیورٹی پلان جاری کر دیا گیا ہے۔ سیکیورٹی پلان کے تحت 2685 پولیس افسران اور اہلکار جلوسوں اور مجالس کی حفاظت کے فرائض سرانجام دیں گے، جن میں 150 لیڈی پولیس اہلکار بھی شامل ہیں۔پولیس کے مطابق محرم الحرام کے دوران ضلع بھر میں 201 چھوٹے بڑے جلوس، 11 تعزیے اور 511 مجالس منعقد ہوں گی، جن کی نگرانی کے لیے خصوصی انتظامات کیے گئے ہیں۔سیکیورٹی کو مزید مؤثر بنانے کے لیے 200 سے زائد رینجرز اہلکار بھی تعینات کیے گئے ہیں، جبکہ کسی بھی ہنگامی صورتحال سے نمٹنے کے لیے پاک فوج کو اسٹینڈ بائی رکھا گیا ہے۔انتظامیہ اور قانون نافذ کرنے والے اداروں کی جانب سے جلوسوں اور مجالس کے راستوں کی نگرانی، داخلی و خارجی راستوں پر چیکنگ، حساس مقامات پر اضافی نفری کی تعیناتی اور امن و امان برقرار رکھنے کے لیے خصوصی اقدامات کیے جا رہے ہیں۔ ضلعی انتظامیہ نے شہریوں سے اپیل کی ہے کہ وہ محرم الحرام کے دوران امن، بھائی چارے اور مذہبی ہم آہنگی کے فروغ کے لیے قانون نافذ کرنے والے اداروں کے ساتھ مکمل تعاون کریں۔