ایپل کا نیا ’آئی فون 18 پرو‘؛ کیا کیا شاندار اے آئی فیچرز اور خصوصیات ہیں ، جانئے!

    کیلے فورنیا:ٹیکنالوجی کی دنیا میں تہلکہ مچانے کے لیے ایپل کا اگلا شاہکار ‘آئی فون 18 پرو’ تیار ہے، جسے 2026 کی سب سے بڑی اور متوقع سمارٹ فون لانچ قرار دیا جا رہا ہے۔ اگرچہ ایپل نے ابھی تک باضابطہ طور پر اس کا اعلان نہیں کیا، لیکن لیکس اور انڈسٹری رپورٹس نے اس ڈیوائس کے فیچرز اور ریلیز کے حوالے سے دلچسپ تفصیلات ظاہر کر دی ہیں۔
    ‘میک ابزرور’ کی رپورٹس کے مطابق ایپل اپنی روایتی ستمبر کی تقریب میں آئی فون 18 پرو اور پرو میکس متعارف کرائے گا۔ سمارٹ فون کے اعلان کے لیے ستمبر کا دوسرا ہفتہ مختص کیے جانے کا امکان ہے، جبکہ فروخت کا آغاز اسی ماہ کے آخر تک شروع ہو سکتا ہے۔ کچھ ذرائع کے مطابق 18 ستمبر 2026 کو اس کی ریلیز کی ممکنہ تاریخ قرار دیا جا رہا ہے۔


    دلچسپ بات یہ ہے کہ اس بار ایپل اپنی لانچ حکمت عملی میں بڑی تبدیلی لا سکتا ہے۔ افواہیں گردش کر رہی ہیں کہ ایپل سب سے پہلے پرو ماڈلز متعارف کرائے گا، جبکہ معیاری ’آئی فون 18‘ کی لانچ کو 2027 کے آغاز تک مؤخر کیا جا سکتا ہے۔
    جدید ترین فیچرز اور کارکردگی
    آئی فون 18 پرو میں ایپل اپنا نیا ‘اے 20 پرو’ چپ سیٹ استعمال کرے گا، جو ‘ٹو نینو میٹر’ (2nm) ٹیکنالوجی پر مبنی ہوگا۔ یہ چپ نہ صرف ڈیوائس کی کارکردگی کو کئی گنا بڑھائے گی بلکہ ایپل کے طاقتور ‘اے آئی’ (AI) فیچرز اور بیٹری کی بچت میں بھی اہم کردار ادا کرے گی۔

    ویری ایبل اپرچر: ایپل پہلی بار اپنے مین کیمرہ میں ویری ایبل اپرچر متعارف کرانے کی منصوبہ بندی کر رہا ہے، جس سے صارفین کو روشنی اور ڈیپتھ کے ساتھ تجربہ کرنے کی زیادہ آزادی ملے گی۔

    میموری اور کنیکٹیویٹی: ڈیوائس میں 12 جی بی تک ریم اور ایپل کا اپنا جدید ’سی 2‘ موڈیم دیا جائے گا، جو بہترین کنیکٹیویٹی فراہم کرے گا۔

    ڈیزائن: ڈائنامک آئی لینڈ کے سائز میں کمی اور نئے پریمیم رنگ متعارف کرائے جانے کی بھی توقع ہے۔

    آئی فون 18 پرو کی حتمی قیمت کے بارے میں تاحال کوئی تصدیق نہیں ہوئی، تاہم ماہرین کا کہنا ہے کہ مینوفیکچرنگ لاگت اور میموری کی قیمتوں میں اضافے کے باعث اس کا پریمیم ماڈل مہنگا ہو سکتا ہے۔
    واضح رہے کہ یہ تمام معلومات انڈسٹری کی رپورٹس اور لیکس پر مبنی ہیں۔ ایپل کی جانب سے باضابطہ تصدیق کا اعلان ستمبر میں ہونے والے خصوصی ایونٹ میں کیا جائے گا، جس کا ٹیکنالوجی کے شوقین افراد بے تابی سے انتظار کر رہے ہیں۔

    Related Posts