زیورخ: یورپ میں خود کار ٹیکنالوجی کے پھیلاؤ کا ایک اہم سنگِ میل عبور کرتے ہوئے، سوئٹزرلینڈ کے شہر زیورخ میں پہلی بار روبوٹیکسی (بغیر ڈرائیور والی ٹیکسی) سروس متعارف کرائی جا رہی ہے۔ اس منصوبے کے لیے معروف ٹیک کمپنی ‘اوبر’ (Uber) اور چینی کمپنی ‘وی رائیڈ’ (WeRide) نے باہمی شراکت داری کا اعلان کیا ہے۔
زیورخ میں روبوٹیکسی سروس رواں سال کے آخر تک ‘اوبر’ کی موبائل ایپ کے ذریعے دستیاب ہوگی۔
اوبر اور وی رائیڈ کا مشترکہ ہدف ہے کہ 2030 تک دنیا بھر کے 15 شہروں میں دسیوں ہزار روبوٹیکسیاں چلائی جائیں۔
حالیہ چند ہفتوں میں یہ دوسرا یورپی شہر ہے جہاں اس جوڑی نے اپنے آپریشنز کا اعلان کیا ہے۔ کچھ عرصہ قبل اسپین کے دارالحکومت میڈرڈ میں بھی اس شراکت داری کا آغاز کیا گیا تھا۔
کمپنیوں کے مطابق، سوئٹزرلینڈ خود کار گاڑیوں (Autonomous Driving) کے لیے یورپ کے سب سے جدید ریگولیٹری ماحول اور بہترین مارکیٹ کے حامل ممالک میں سے ایک ہے۔ وی رائیڈ کی چیف فنانشل آفیسر جینیفر لی کا کہنا ہے کہ "دو ہفتوں کے اندر دو یورپی منڈیوں میں سروس کا اعلان ہماری توسیع کی حکمت عملی کی رفتار اور کارکردگی کو ظاہر کرتا ہے۔”
اوبر کی جانب سے جاری کردہ بیان میں کہا گیا ہے کہ روبوٹیکسیوں کا فلیٹ بتدریج بڑھایا جائے گا۔ سروس کا آغاز مقامی حکام کے ساتھ قریبی رابطے میں کیا جائے گا تاکہ کارکردگی کے تمام معیارات پورے کیے جا سکیں۔ حتمی مقصد یہ ہے کہ شہر کے مرکزی کاروباری علاقوں میں مکمل طور پر بغیر ڈرائیور والی کمرشل سروس فراہم کی جائے۔
یاد رہے کہ یہ دونوں کمپنیاں پہلے ہی متحدہ عرب امارات کے شہروں دبئی، ابوظہبی اور سعودی عرب کے دارالحکومت ریاض میں کامیابی سے اپنی روبوٹیکسی خدمات فراہم کر رہی ہیں۔ اب زیورخ میں اس ٹیکنالوجی کا داخلہ اس بات کی علامت ہے کہ یورپ بھی اب خود کار نقل و حمل کے مستقبل کو اپنانے کی جانب تیزی سے بڑھ رہا ہے۔
زیورخ میں خود کار ٹیکسیوں (Robotaxis) کا آغاز؛ سوئٹزر لینڈ بلا ڈرائیور ٹیکسی سروس والایورپ کا دوسرا ملک
