کچے میں انٹیلی جنس بیسڈ آپریشن، راجن پور پولیس کے ہاتھوں لونڈ گینگ کا سربراہ شاہ دین لونڈ مارا گیا

لاہور:پنجاب پولیس راجن پور نے سالِ نو کے آغاز پر کچہ کریمنلز کے خلاف بڑی اور اہم کامیابی حاصل کر لی۔ راجن پور پولیس نے انٹیلی جنس بیسڈ آپریشن کے دوران لونڈ گینگ کے سرغنہ شاہ دین لونڈ کو جہنم واصل کر دیا۔
ترجمان پنجاب پولیس نے تفصیلات سے آگاہ کرتے ہوئے بتایا کہ راجن پور پولیس نے کچے کے علاقے میں لونڈ گینگ کے خلاف مؤثر انٹیلی جنس بیسڈ آپریشن کیا۔ آپریشن کے دوران ملزمان کی جانب سے پولیس پر فائرنگ کی گئی جس کے جواب میں پولیس کی مؤثر کارروائی سے لونڈ گینگ کا سرغنہ شاہ دین لونڈ ہلاک ہو گیا۔ ہلاک ہونے والا ڈاکو قتل، اغوا برائے تاوان اور ڈکیتی سمیت درجنوں سنگین مقدمات میں پولیس کو مطلوب تھا۔ آپریشن کے دوران راجن پور پولیس کی بھاری نفری لونڈ گینگ کے ٹھکانوں میں داخل ہوئی۔ پولیس کی جوابی فائرنگ سے تین ڈاکو زخمی ہو گئے جو اپنے زخمی ساتھیوں سمیت فرار ہو گئے۔
ڈی پی او راجن پور نے بتایا کہ فرار ہونے والے ڈاکوؤں کا تعاقب جاری ہے اور جلد انہیں قانون کے کٹہرے میں لایا جائے گا۔
انسپکٹر جنرل پولیس پنجاب ڈاکٹر عثمان انور نے لونڈ گینگ کے سرغنہ کو جہنم واصل کرنے پر راجن پور پولیس کو شاباش دیتے ہوئے کہا کہ کچہ کریمنلز کے خلاف بلا امتیاز کارروائیاں جاری رہیں گی اور عوام کے جان و مال کے تحفظ پر کوئی سمجھوتہ نہیں کیا جائے گا۔