سیالکوٹ (سلیم احمد اعوان شیخو)
یونیورسٹی آف سیالکوٹ کے دوسرے کانووکیشن کا انعقاد مقامی مارکی میں کیا گیا، جس میں وزیر دفاع خواجہ محمد آصف، گورنر پنجاب سردار سلیم حیدر خان اور صوبائی وزیر محنت و افرادی قوت محمد منشاء اللہ بٹ نے خصوصی شرکت کی۔تقریب میں چیئرمین بورڈ آف گورنرز یونیورسٹی آف سیالکوٹ فیصل منظور، وائس چانسلر پروفیسر ڈاکٹر محمد خلیق الرحمٰن، صدر سیالکوٹ چیمبر آف کامرس اینڈ انڈسٹری خاور حسین سپال، ایم ریاض الدین شیخ اور ممبر صوبائی اسمبلی چودہری فیصل اکرام سمیت دیگر معززین نے بھی بڑی تعداد میں شرکت کی۔تقریب سے خطاب کرتے ہوئے وفاقی وزیر دفاع خواجہ محمد آصف کا کہنا تھا کہ ڈگری ایک نئے سفر کے آغاز کا ٹکٹ ہے۔ اب فارغ التحصیل طلبہ کو معاشرے میں اپنا مقام بنانے کے لیے محنت، لگن اور اپنی صلاحیتوں کے ذریعے آگے بڑھنا ہوگا۔ گزشتہ اڑھائی سے تین سال کے دوران پاکستان کو بین الاقوامی سطح پر تاریخی پذیرائی حاصل ہوئی ہے۔ ڈیڑھ سال قبل پاکستان نے اپنے ازلی دشمن کو شکست دی، جس کے بعد دنیا نے ہماری مسلح افواج کی صلاحیتوں اور پیشہ ورانہ مہارت کا لوہا مانا۔ ماضی کی جنگوں میں کامیابی کے حوالے سے شکوک و شبہات پیدا کیے جاتے رہے، تاہم معرکہ بنیان المرصوص میں دنیا نے پاکستان کی فتح اور بھارت کی شکست کو تسلیم کیا۔گورنر پنجاب سردار سلیم حیدر خان نے اپنے خطاب میں کہا کہ ڈگریاں حاصل کرنے والے طلبہ کے لیے آج فخر اور خوشی کا دن ہے۔ ڈگری زندگی کا پہلا قدم ہے، جبکہ اس کے بعد ملک، والدین اور اپنی ذات کے لیے مزید کامیابیاں حاصل کرنے کا اصل مرحلہ شروع ہوتا ہے۔انہوں نے طلبہ کو مخاطب کرتے ہوئے کہا کہ ان کی کامیابی میں والدین کی محنت، قربانیوں اور دعاؤں کا بنیادی کردار شامل ہے۔ لہٰذا تمام فارغ التحصیل طلبہ اپنے والدین کی توقعات پر پورا اتریں اور عملی زندگی میں ایمانداری، محنت اور ذمہ داری کو اپنا شعار بنائیں۔ اساتذہ کے کردار کو سراہتے ہوئے انہوں نے کہا کہ طلبہ کی تربیت اور کردار سازی میں اساتذہ کا اہم حصہ ہوتا ہے، اس لیے طلبہ کو ہمیشہ اپنے اساتذہ کا احترام کرنا چاہیے۔کانووکیشن کے آخر میں یونیورسٹی آف سیالکوٹ کی مختلف فیکلٹیز کے فارغ التحصیل طلبہ و طالبات میں اسناد تقسیم کی گئیں، جبکہ نمایاں تعلیمی کارکردگی کا مظاہرہ کرنے والے پوزیشن ہولڈرز کو گولڈ میڈلز سے نوازا گیا۔ تقریب میں شرکاء نے طلبہ کی کامیابیوں کو خوب سراہا اور انہیں عملی زندگی میں ملک و قوم کی ترقی کے لیے بھرپور کردار ادا کرنے کی ترغیب دی۔