لاہور: (حافظ نعیم )وزیراعلی مریم نواز شریف کا سیلاب متاثرہ علاقوں کے طالب علموں کے لیے بڑا اعلان ایک سمسٹر کی فیس معاف، خصوصی پیکیج کی منظوری دے دی۔
رپورٹ کے مطابق سیلاب متاثرہ علاقوں کے تمام طلباء کی ایک سمسٹر کی فیس جبکہ سیلاب متاثرہ اضلاع کے بی ایس فرسٹ ایئر کے طلباء کی داخلہ فیس معاف کر دی گئی ہے۔
سیلاب متاثرہ مظفرگڑھ، ملتان، لودھراں، وہاڑی، سیالکوٹ، نارووال، گجرات، چنیوٹ اور قصور کے طلباء کی سال اول کی فیس معاف کی گئی ہے جبکہ سیلاب متاثرہ ان اضلاع میں واقع تمام یونیورسٹیوں میں رجسٹریشن کی آخری تاریخ میں 20 دن کی توسیع بھی کر دی گئی۔
ہونہار اسکالرشپ کے لیے درخواست دینے کی آخری تاریخ بھی ایک ماہ تک بڑھا دی گئی۔وزیراعلی مریم نواز شریف نے سیلاب متاثرہ علاقوں کے طلباء کے والدین کی مالی مشکلات کم کرنے اور نوجوانوں کی سہولت کے لیے پیکج دیا۔ وزیراعلی مریم نواز کا کہنا تھا کہ سیلاب کی تباہی کے دوران اپنے بچوں اور بچیوں کی تعلیم متاثر نہیں ہونے دوں گی، پوری کوشش جاری ہے کہ سیلاب متاثرین کی پوری مدد یقینی ہو، جلد بحالی اور نقصانات کا ازالہ ہو۔