نئی دہلی (ویب ڈیسک)
بھارت میں ایک دل دہلا دینے والے واقعے میں سفاک ماں نے محض اس بات پر طیش میں آکر اپنی 4 سالہ معصوم بیٹی کو تشدد کا نشانہ بنا کر قتل کر دیا کہ بچی نے پوجا شروع ہونے سے قبل پرساد (تبرک) کھا لیا تھا۔
بھارتی میڈیا رپورٹس کے مطابق یہ افسوسناک واقعہ ریاست مہاراشٹر کے علاقے پالگھر میں پیش آیا، جہاں ملزمہ نے گھر میں پوجا کی تیاری کے دوران رکھی گئی مٹھائی کھانے پر اپنی کمسن بیٹی پر وحشیانہ تشدد کیا۔
پولیس حکام کا کہنا ہے کہ بچی نے معصومیت میں پوجا سے پہلے ہی پرساد اٹھا کر کھا لیا تھا، جس پر ماں آپے سے باہر ہو گئی اور بچی کو بری طرح مارنا پیٹنا شروع کر دیا۔ شدید تشدد کے باعث 4 سالہ بچی زخموں کی تاب نہ لاتے ہوئے موقع پر ہی دم توڑ گئی۔
واقعے کی اطلاع ملتے ہی پولیس نے موقع پر پہنچ کر بچی کی لاش کو تحویل میں لے کر پوسٹ مارٹم کے لیے ہسپتال منتقل کر دیا، جبکہ ملزمہ ماں کو حراست میں لے کر قتل کا مقدمہ درج کر لیا گیا ہے۔ پولیس کے مطابق واقعے کی مزید تفتیش جاری ہے۔

