فون کا پانی میں حادثاتی طور پر گر جانا خوفزدہ کر دیتا ہے۔ بیشتر اسمارٹ فون اب کسی حد تک واٹر ریزیزٹنٹ ہوتے ہیں مگر واٹر پروف نہیں۔ یہی وجہ ہے کہ آپ انہیں زیادہ وقت تک پانی میں بھگو کر نہیں رکھ سکتے یا گہرے پانی میں گرانے کا سوچ نہیں سکتے۔
اس سے ہٹ کر بھی کچھ سیال ایسے ہوتے ہیں جو 100 فیصد پانی پر مشتمل نہیں ہوتے اور چپچپے مواد کو ڈیوائس پر چھوڑ جاتے ہیں۔ اگر آپ کا فون کبھی پانی میں گرتا ہے تو درج ذیل غلطیوں کو کرنے سے ہر صورت میں گریز کریں:
1. گیلے فون کو کبھی چارج پر مت لگائیں
اگر فون گیلا ہو تو اسے چارج پر لگانے سے شارٹ سرکٹ کا خطرہ بڑھ جاتا ہے۔ پانی اور بجلی کا تال میل فون کے لیے تباہ کن ثابت ہوتا ہے۔ اگر چارج کرنا کسی وجہ سے بہت زیادہ ضروری ہو تو وائرلیس چارجنگ کا استعمال کیا جاسکتا ہے (اگر فون میں اس کی سپورٹ موجود ہو)، لیکن وائر چارجر کا استعمال کم از کم 48 گھنٹوں تک ہرگز نہ کریں۔
2. فون کو خشک چاولوں میں نہ رکھیں
عام طور پر یہ سمجھا جاتا ہے کہ فون کو چاولوں میں دبانے سے نمی نکل جاتی ہے، لیکن چاولوں میں گرد کی مقدار کافی زیادہ ہوتی ہے اور فون کو اس میں رکھنے سے گرد کے ذرات ڈیوائس کے اندر جا کر مزید نقصان پہنچا سکتے ہیں۔ فون کو قدرتی طور پر ہوا سے خشک ہونے دیں۔
3. زور سے ہلانے سے گریز کریں
فون سے پانی نکالنے کے لیے اسے بہت زیادہ ہلانے یا جھٹکے دینے سے گریز کریں۔ گیلے فون کو زور سے ہلانے سے صورتحال زیادہ بدتر ہوسکتی ہے کیونکہ پانی باہر نکلنے کی بجائے مزید اندرونی حصوں اور زیادہ گہرائی میں جا سکتا ہے۔
4. باہری حرارت (ہیٹ) سے خشک نہ کریں
ہیئر ڈرائیر یا ایسی کسی بھی حرارت دینے والی چیز سے فون کو خشک کرنے کی کوشش نہ کریں۔ بیرونی حرارت فراہم کرنے والی ڈیوائسز سے فون کے اندرونی افعال کو شدید نقصان پہنچتا ہے، خاص طور پر بیٹری، بیک پینل اور اسکرین کو۔
بہتر یہی ہے کہ فون کو بند کر کے کسی ہوادار جگہ پر قدرتی طور پر خشک ہونے دیا جائے۔

