لاہور: وزیراعلیٰ پنجاب مریم نواز شریف نے صوبے کو محفوظ ترین بنانے کے عزم کے تحت خواتین اور بچوں کے تحفظ کے لیے نیا اینٹی ریپ ایکٹ متعارف کرانے اور خصوصی "سپیڈی کورٹس” قائم کرنے کا حکم دے دیا ہے۔
محفوظ نہیں محفوظ ترین پنجاب!
وزیراعلیٰ مریم نواز شریف کا خواتین اور بچوں کے تحفظ کے لیے نئے اینٹی ریپ ایکٹ، سپیڈی کورٹس کے قیام اور مقررہ مدت میں مقدمات کے فیصلوں کا حکم۔ جدید ٹیکنالوجی اور اے آئی کی مدد سے تفتیش و پراسیکیوشن بہتر بنائی جائے گی، جبکہ ملزمان کو قرار واقعی سزا دلانے کے لیے مؤثر قانون سازی ہوگی۔
خواتین اور بچوں کا تحفظ وزیراعلی مریم نواز کی اولین ترجیح ہے کسی بھی مجرم کو قانون سے بچنے نہیں دیا جائے گا۔— Marriyum Aurangzeb (@Marriyum_A) November 16, 2026
وزیراعلیٰ کی زیر صدارت منعقدہ اعلیٰ سطحی اجلاس میں خواتین اور بچوں کے خلاف جرائم کی روک تھام اور مقدمات میں سزاؤں کی شرح بڑھانے کے لیے اہم فیصلے کیے گئے۔ اجلاس میں ہدایت کی گئی کہ زیادتی اور تشدد کے مقدمات کے فیصلے مقررہ مدت کے اندر یقینی بنائے جائیں تاکہ متاثرین کو بروقت انصاف میسر آ سکے۔ سینئیر وزیرمریم اورنگزیب کی جانب سے سوشل میڈیا پر کی جانے والی پوسٹ کے مطابق مقدمات کی تفتیش اور پراسیکیوشن کے نظام کو مؤثر بنانے کے لیے جدید ٹیکنالوجی اور مصنوعی ذہانت (آرٹیفیشل انٹیلی جنس) سے مدد لی جائے گی، جبکہ ملزمان کو قرار واقعی سزا دلانے کے لیے سخت اور جامع قانون سازی عمل میں لائی جائے گی۔وزیراعلیٰ مریم نواز نے واضح کیا کہ خواتین اور بچوں کا تحفظ حکومت کی اولین ترجیح اور "ریڈ لائن” ہے، اور اس حوالے سے زیرو ٹالرنس پالیسی کے تحت کسی بھی مجرم کو قانون کی گرفت سے بچنے نہیں دیا جائے گا۔

