ویب ڈیسک:
ٹیکنالوجی کی معروف عالمی کمپنی مائیکروسافٹ (Microsoft) نے حالیہ 36 گھنٹے طویل تکنیکی خرابی اور سروس کی بندش کے بعد صارفین کے لیے ایک انتہائی اہم سیکیورٹی وارننگ جاری کر دی ہے۔ کمپنی نے خبردار کیا ہے کہ سائبر مجرم اور ہیکرز سروس میں آنے والے تعطل کا فائدہ اٹھاتے ہوئے صارفین کا حساس ڈیٹا، لاگ ان تفصیلات اور پاس ورڈز چرانے کی کوشش کر رہے ہیں۔
مائیکروسافٹ کی تھریٹ انٹیلی جنس ٹیم کے مطابق، گزشتہ دنوں آؤٹ لک (Outlook)، ٹیمز (Teams)، ون ڈرائیو (OneDrive) اور مائیکروسافٹ 365 کی سروسز تقریباً 36 گھنٹے تک متاثر رہیں۔ اب سروسز بحال ہونے کے بعد ہیکرز صارفین کو مائیکروسافٹ کے نام سے جعلی ای میلز (Phishing Emails) اور نوٹیفکیشنز بھیج رہے ہیں۔
ان جعلی پیغامات میں صارفین کو خوفزدہ کیا جاتا ہے کہ:
-
سروس کی بندش کے دوران ان کی اہم ای میلز رک گئی تھیں۔
-
اگر انہوں نے دیے گئے لنک پر کلک کر کے اپنا اکاؤنٹ بحال نہ کیا تو ان کی ای میلز اور ڈیٹا 24 گھنٹوں میں مستقل طور پر ڈیلیٹ ہو جائے گا۔
جیسے ہی کوئی صارف اس مشکوک لنک پر کلک کرتا ہے، وہ ایک جعلی لاگ ان صفحے پر پہنچ جاتا ہے جہاں ہیکرز اس کا یوزر نیم اور پاس ورڈ چرا لیتے ہیں اور اس کے لیپ ٹاپ یا اسمارٹ فون میں نقب لگانے کی کوشش کرتے ہیں۔
: کمپنی نے واضح کیا ہے کہ سروس میں تعطل کسی سائبر حملے کا نتیجہ نہیں تھا بلکہ خالصتاً اندرونی تکنیکی خرابی تھی۔ تاہم، موجودہ ہیکنگ مہم سے بچنے کے لیے صارفین درج ذیل احتیاطی تدابیر اختیار کریں:
-
سروس کی بحالی یا ای میلز ڈیلیٹ ہونے سے متعلق کسی بھی مشکوک ای میل یا پیغام میں دیے گئے لنک پر ہرگز کلک نہ کریں۔
-
کسی بھی غیر مصدقہ ویب سائٹ یا لنک کے ذریعے اپنا مائیکروسافٹ پاس ورڈ دوبارہ درج نہ کریں۔
-
سروس کی صورتحال جاننے کے لیے صرف مائیکروسافٹ کے آفیشل پورٹل یا تصدیق شدہ سوشل میڈیا اکاؤنٹس کا رخ کریں۔
-
اپنے اکاؤنٹ کی حفاظت کے لیے ٹو فیکٹر آتھنٹیکیشن (2FA) کو فعال رکھیں۔

