سیئول: جنوبی کوریا میں قومی سطح کے انتہائی مسابقتی ٹیکس اکاؤنٹنٹ امتحان میں پہلی پوزیشن حاصل کرنے والے امیدوار نے مصنوعی ذہانت (اے آئی) کے ذریعے نقل کرنے کا اعتراف کر لیا ہے، جس کے بعد قانون نافذ کرنے والے اداروں اور پولیس نے باقاعدہ تحقیقات کا آغاز کر دیا ہے۔
مقامی میڈیا رپورٹس کے مطابق مذکورہ امیدوار نے رواں برس اپریل اور جولائی میں منعقد ہونے والے ٹیکس اکاؤنٹنٹ امتحان کے دونوں مراحل میں شاندار کارکردگی کا مظاہرہ کرتے ہوئے پہلی پوزیشن حاصل کی تھی۔ امتحان کے پہلے مرحلے میں اس نے مجموعی طور پر 400 میں سے 397.5 نمبر حاصل کیے تھے اور 160 سوالات میں سے صرف ایک سوال کا غلط جواب دیا تھا، جس کے بعد اس کی غیر معمولی اور حیران کن کارکردگی پر شکوک و شبہات پیدا ہوئے اور نقل کے سنگین الزامات سامنے آئے۔
تحقیقات اور دباؤ بڑھنے پر امیدوار نے اپنے وکیل کے ذریعے اعتراف کیا کہ اس نے امتحانی کمرے میں خفیہ طریقے سے ایک چھوٹے کیمرے کی مدد سے سوالات کی تصاویر محفوظ کیں اور پھر انہیں مصنوعی ذہانت (اے آئی) پلیٹ فارم کو بھیج کر درست جوابات حاصل کیے، جنہیں بعد ازاں اس نے اپنے اسمارٹ فون پر دیکھ کر حل کیا۔ پولیس نے واقعے کا مقدمہ درج کر کے مزید تفتیش شروع کر دی ہے۔
اے آئی کے ذریعے مقابلے کے امتحان میں ٹاپ کرنیوالے امیدوار کے خلاف تحقیقات شروع

