ویب ڈیسک:
مشرق وسطیٰ میں کشیدگی اور ایران کے ساتھ جاری تناؤ کے دوران امریکی بحریہ کا تیسرا طیارہ بردار بحری بیڑا ’یو ایس ایس تھیوڈور روزویلٹ‘ (USS Theodore Roosevelt) امریکی سینٹرل کمانڈ (سینٹ کام) کے زیرِ انتظام علاقے میں پہنچ گیا ہے۔
بین الاقوامی خبر رساں اداروں کے مطابق ایک امریکی دفاعی عہدیدار نے تصدیق کی ہے کہ یو ایس ایس تھیوڈور روزویلٹ کی آمد کے بعد مشرق وسطیٰ میں بیک وقت تعینات امریکی طیارہ بردار بحری جہازوں کی تعداد تین ہو گئی ہے۔ اس سے قبل ’یو ایس ایس جارج ایچ ڈبلیو بش‘ اور ’یو ایس ایس جارج واشنگٹن‘ بحیرہ عرب اور خطے کے دیگر پانیوں میں پہلے ہی موجود ہیں۔
رپورٹس کے مطابق خطے میں 20 سے زائد امریکی جنگی جہاز اور 50 ہزار سے زائد فوجی اہلکار تعینات ہیں جن کا بنیادی مقصد ایرانی بندرگاہوں کی ناکہ بندی کو مؤثر بنانا اور سمندری گزرگاہوں کی نگرانی کرنا ہے۔ ابتدائی طور پر روزویلٹ کو یو ایس ایس جارج واشنگٹن کی جگہ تعینات کیا جانا تھا، تاہم حالیہ کشیدگی کے باعث تینوں بحری بیڑے تاحال خطے میں موجود ہیں، جو اپریل کے بعد خطے میں امریکی بحری طاقت کا سب سے بڑا اجتماع ہے۔
یہ پیش رفت ایسے وقت میں سامنے آئی ہے جب فروری میں شروع ہونے والے تنازع کے خاتمے کے لیے سفارتی کوششیں تعطل کا شکار ہیں اور اتوار کے روز بحرین میں امریکی فوجی اڈے پر ڈرون حملے کی اطلاعات بھی موصول ہوئی ہیں، جس سے خطے میں ایک بار پھر بڑے تصادم کے خدشات بڑھ گئے ہیں۔

