پاکپتن(رپورٹ:اکرام حسین شاہ )
ضلع بھر میں ٹریفک حادثات کا سلسلہ تھمنے کا نام نہیں لے رہا، جس کے باعث شہریوں میں شدید تشویش پائی جاتی ہے۔ تازہ واقعات میں ایک ہی روز پیش آنے والے تین مختلف ٹریفک حادثات کے نتیجے میں پانچ سالہ معصوم بچہ جان کی بازی ہار گیا جبکہ تین افراد شدید زخمی ہو گئے۔
شہریوں کے مطابق تیز رفتاری، دورانِ ڈرائیونگ موبائل فون کا استعمال، ڈرائیوروں کی غفلت، ون ویلنگ و ڈبل سواری کا بے جا استعمال اور خصوصاً مرکزی شاہراہوں پر جگہ جگہ بنائے گئے غیر ضروری یو ٹرن ان حادثات کی بڑی وجوہات بن رہے ہیں۔
شہریوں نے ڈپٹی کمشنر آصف رضا سے پرزور مطالبہ کیا ہے کہ مین شاہراہوں اور بالخصوص جمال چوک سے پرانا پھاٹک تک بنائے گئے غیر ضروری یو ٹرن فوری طور پر بند کیے جائیں۔ مزید برآں، ٹریفک قوانین پر سختی سے عمل درآمد کروایا جائے اور غفلت کے مرتکب ڈرائیوروں کے خلاف بلاامتیاز کارروائی عمل میں لائی جائے تاکہ قیمتی انسانی جانوں کے ضیاع کو روکا جا سکے۔ شہری حلقوں کا کہنا ہے کہ موثر ٹریفک مینجمنٹ اور غیر ضروری یو ٹرن کے خاتمے سے حادثات پر قابو پایا جا سکتا ہے، تاہم اب دیکھنا یہ ہے کہ ضلعی انتظامیہ اس عوامی مطالبے پر کب عملی اقدامات اٹھاتی ہے۔




