لاپتہ اسپیشل پولیس آفیسر کی لاش گھر کے قریب سے برآمد، سروس رائفل بھی ساتھ ملی

 مقبوضہ جموں و کشمیر کے ضلع کشتواڑ میں جمعرات کی دیر شام سے لاپتہ ہونے والے اسپیشل  پولیس آفیسر (ایس پی او) بشیر احمد کی لاش جمعہ کی صبح ان کے گھر کے قریب سے برآمد ہو گئی ہے۔موصولہ اطلاعات کے مطابق، بشیر احمد گزشتہ روز اچانک لاپتہ ہو گئے تھے اور واقعہ کے وقت ان کی سروس رائفل بھی ان کے ساتھ موجود نہیں تھی۔ تاہم، جب جمعہ کی صبح ان کی لاش ملی تو حیرت انگیز طور پر ان کی سروس رائفل بھی لاش کے بالکل قریب ہی پڑی ہوئی پائی گئی۔واقعے کی اطلاع ملتے ہی مقامی پولیس اور فارنسک سائنس لیبارٹری (ایف ایس ایل) کی ٹیمیں فوری طور پر جائے وقوعہ پر پہنچ گئیں۔ ایف ایس ایل کی ٹیم نے موقع سے تمام ضروری شواہد اکٹھے کرنے کا عمل شروع کر دیا ہے تاکہ اس پُراسرار واقعے اور موت کی اصل وجوہات کا سراغ لگایا جا سکے۔ پولیس کی جانب سے معاملے کی مزید تفتیش جاری ہے۔