زرداری ہاؤس تقریب منعقد کی گئی، جس میں پارٹی عہدیداران اور کارکنان نے بھرپور شرکت کی۔
سانگھڑ (رپورٹ: اشفاق سلہری)
چیئرمین پاکستان پیپلز پارٹی بلاول بھٹو زرداری کی 38 ویں سالگرہ کے موقع پر زرداری ہاؤس سانگھڑ میں ایک پروقار تقریب کا انعقاد کیا گیا، جس کی میزبانی پیپلز پارٹی تعلقہ سانگھڑ کے صدر اعجاز حسین زرداری نے کی۔
تقریب میں پیپلز پارٹی کے ضلعی انفارمیشن سیکریٹری عمران حیدر دھامرہ، وفاقی امن کمیٹی کے رکن راجیش کمار ہرداسانی، چیئرمین میونسپلٹی سانگھڑ راشد اسلام مغل، تعلقہ جنرل سیکریٹری مرید شاہ لکیاری، پیپلز پارٹی مینارٹی ونگ کے ضلعی صدر من موہن داس، سٹی صدر غلام حیدر پنہور، منصور احمد پنہور، مدد علی شاہ، عثمان غنی، ڈپٹی انفارمیشن سیکریٹری عبدالباسط لانڈر، راجا خیر محمد لغاری اور عمران علی انڑ سمیت دیگر عہدیداران، کارکنان اور جیالوں نے بڑی تعداد میں شرکت کی۔
تقریب سے خطاب کرتے ہوئے تعلقہ صدر اعجاز حسین زرداری نے بلاول بھٹو زرداری کو 38 ویں سالگرہ کی دلی مبارکباد پیش کی۔ انہوں نے کہا کہ بلاول بھٹو زرداری پاکستان پیپلز پارٹی کی نوجوان قیادت اور جمہوری جدوجہد کے تسلسل کی علامت ہیں۔ ان کی قیادت میں پیپلز پارٹی عوامی مسائل کے حل، جمہوریت کے استحکام اور ملک کی ترقی کے لیے اپنی جدوجہد جاری رکھے گی۔
انہوں نے مزید کہا کہ پیپلز پارٹی کے کارکنان سالگرہ کے اس پرمسرت موقع پر اپنے قائد کو خراجِ تحسین پیش کرتے ہیں اور دعا گو ہیں کہ اللہ تعالیٰ انہیں صحت، سلامتی اور درازیٔ عمر عطا فرمائے تاکہ وہ عوام کی خدمت کا سفر اسی جذبے کے ساتھ جاری رکھ سکیں۔
تقریب کے اختتام پر شرکاء نے بلاول بھٹو زرداری کی سالگرہ کا کیک کاٹا اور ان کی صحت، سلامتی اور سیاسی کامیابیوں کے لیے نیک خواہشات کا اظہار کیا۔