بھارتی فلم انڈسٹری کی سینئر اداکارہ میتھو مکھرجی 71 برس کی عمر میں انتقال کرگئیں۔ اداکارہ ممبئی کے ایک نجی اسپتال میں زیر علاج تھیں اور گزشتہ ایک سال سے کینسر کے مرض سے لڑ رہی تھیں۔
میتھو مکھرجی نے اپنے طویل فلمی کیریئر کا زیادہ حصہ بنگالی سنیما کو دیا اور 1970 اور 1980 کی دہائیوں میں اپنی اداکاری کے ذریعے نمایاں مقام حاصل کیا۔ وہ اپنے دور کی بنگالی فلم انڈسٹری کے معروف ناموں میں شمار ہوتی تھیں۔
اداکارہ نے بنگالی سنیما کے متعدد بڑے فنکاروں کے ساتھ کام کیا، جن میں اتم کمار، سومیترا چٹوپادھیائے اور رنجیت ملک شامل ہیں۔ ان کی قابل ذکر فلموں میں ’مرجینا عبداللہ‘، ’نشی کانیا‘ اور ’موچک‘ شامل ہیں۔
میتھو مکھرجی نے صرف بنگالی فلموں تک خود کو محدود نہیں رکھا بلکہ ہندی سنیما میں بھی کام کیا۔ ان کی اہم ہندی فلموں میں ’خان دوست‘، ’سفید جھوٹ‘، ’دل لگی‘ اور ’دو لڑکے دونوں کڑکے‘ شامل ہیں۔