ہنگورجا: زرعی زمین کی رقم میں فراڈ اور دھمکیوں کے خلاف معذور بیوہ خاتون پریس کلب پہنچ گئی، انصاف کا مطالبہ

  11 ویسا زمین کا معاملہ، 3 لاکھ 20 ہزار کی بقایا رقم نہ ملنے پر خاتون کا ایس ایس پی خیرپور کے سامنے احتجاج کا اعلان

ہنگورجا (رپورٹ: فیاض محسن سولنگی)

ہنگورجا کے قریب گاؤں ولی محمد نوحپوٹو (رسول آباد) کی رہائشی بزرگ، معذور اور بیوہ خاتون بھوران خاتون نوحپوٹو نے زرعی زمین کی رقم ہڑپ کرنے، فراڈ اور قتل کی دھمکیاں دینے کے خلاف سٹی پریس کلب ہنگورجا میں صحافیوں کے سامنے فریاد کرتے ہوئے اعلیٰ حکام سے انصاف کی اپیل کی ہے۔

بھوران خاتون کے مطابق ان کے والد کے حصے میں آنے والی دیہہ تنیا کے سروے نمبر 72 میں واقع 11 ویسا زرعی زمین 4 لاکھ روپے میں فروخت کرنے کا معاہدہ رسول آباد کے رہائشی عبدالقادر میمن، جان محمد عرف جانو تھیبو اور شبیر نوحپوٹو سے ہوا تھا۔ معاہدے کے تحت انہیں صرف 80 ہزار روپے ایڈوانس دیے گئے جبکہ باقی رقم کی ادائیگی کا دلاسہ دیا جاتا رہا۔ سال 2025 میں اسٹامپ پیپر پر دستخط بھی کروائے گئے، لیکن اس کے باوجود بقایا 3 لاکھ 20 ہزار روپے ادا نہیں کیے گئے۔

متاثرہ خاتون نے الزام عائد کیا کہ بقایا رقم کا مطالبہ کرنے پر مذکورہ افراد نے انہیں باہمی مشاورت سے قتل کی دھمکیاں دیں اور خاموش رہنے کا کہا، جس کے باعث وہ شدید خوف اور مالی پریشانی کا شکار ہیں۔ انہوں نے صحافیوں کے سامنے روتے ہوئے کہا کہ غریب اور معذور ہونے کی وجہ سے ان کا اللہ کے سوا کوئی سہارا نہیں ہے۔

انہوں نے اعلیٰ پولیس حکام اور ضلعی انتظامیہ سے مطالبہ کیا کہ اسٹامپ پیپر، زمین کے ریکارڈ اور مالی لین دین کی شفاف تحقیقات کرائی جائیں اور ملوث افراد کے خلاف قانون کے مطابق کارروائی کی جائے۔ انہوں نے خبردار کیا کہ اگر انہیں انصاف نہ ملا تو وہ ایس ایس پی خیرپور کے دفتر کے سامنے قرآن پاک اٹھا کر احتجاج کریں گی۔