جھڈو ( رپورٹ / قیصر راجہ راجپوت)
عوامی تحریک تحصیل جھڈو کا اجلاس صدر ممتاز جونیجو کی صدارت میں منعقد ہوا، جس میں ضلعی جنرل سیکریٹری ایاز کھوسو نے خصوصی شرکت کی۔ اجلاس میں فیصلہ کیا گیا کہ یکم ستمبر سے 12 ستمبر تک تحصیل جھڈو میں عوامی بیداری مہم چلائی جائے گی۔اس موقع پر عوامی تحریک ضلع میرپورخاص کے جنرل سیکریٹری ایاز کھوسو، تعلقہ صدر ممتاز جونیجو، جنرل سیکریٹری وکیل ایاز کلوئی، وکیل ممتاز کھوسو، شاہ عالم چانڈیو، اسماعیل پتافی اور دیگر نے خطاب کرتے ہوئے کہا کہ سندھ کو ٹکڑے ٹکڑے کرنے، معدنی وسائل اور زمینوں پر قبضوں، جلالپور سمیت دیگر نئے کینال نکالنے اور ڈیم بنانے کے خلاف عوامی تحریک کے مرکزی فیصلے کے تحت پورے سندھ کی طرح تعلقہ جھڈو میں بھی عوامی بیداری مہم چلائی جائے گی۔
انہوں نے بتایا کہ مہم کے سلسلے میں سلور موری، آہوری، روشن آباد، نئون کوٹ، ملکاڻي شریف، فضل بھنبھرو، نفیس نگر، ڈاجھیر، پچان موری، گگھ موری سمیت کئی دیہات میں پروگرامز کی منصوبہ بندی کی گئی ہے۔رہنماؤں نے کہا کہ 12 ستمبر بروز ہفتہ سندھ یانی تحریک اور عوامی تحریک کی جانب سے جھڈو شہر میں بڑی ریلی نکالی جائے گی، جس کے دوران عوامی بیداری مہم چلانے کے ساتھ پمفلٹس بھی تقسیم کیے جائیں گے۔
مقررین نے الزام عائد کیا کہ پیپلز پارٹی کی حکومت تمام سندھ دشمن منصوبوں سمیت نئے صوبوں کے قیام میں سہولت کار بنی ہوئی ہے۔ انہوں نے کہا کہ ہزاروں سال پر مشتمل سندھ دھرتی کو تقسیم کرنے کی ہر سازش کو ناکام بنایا جائے گا۔
انہوں نے پیپلز پارٹی سندھ کے صدر نثار کھوڑو کی جانب سے سندھ اسمبلی میں سندھ کی ممکنہ تقسیم پر بحث کرانے کی مذمت کرتے ہوئے مطالبہ کیا کہ نئے صوبوں کے خلاف فوری طور پر سندھ اسمبلی سے قرارداد منظور کی جائے اور سندھ کی ممکنہ تقسیم کے معاملے کو ہمیشہ کے لیے ختم کیا جائے۔عوامی تحریک کے رہنماؤں نے مطالبہ کیا کہ جلالپور کینال سمیت نئے کینال اور ڈیموں کے منصوبے فوری طور پر مسترد کیے جائیں، اور سندھ کی تمام ٹیل تک پانی پہنچایا جائے۔ انہوں نے سندھ میں مصنوعی مہنگائی کے خاتمے اور امن و امان کی صورتحال بہتر بنانے کا بھی مطالبہ کیا۔