"صدر ٹرمپ ایران کے خلاف جنگ سے فوراً باہر نکلیں!”: سابق نیشنل کاؤنٹر ٹیررازم ڈائریکٹر جوئے کینٹ کی وارننگ

واشنگٹن :نیشنل کاؤنٹر ٹیررازم سینٹر (NCTC) کے سابق ڈائریکٹر اور معروف شخصیت جوئے کینٹ (Joe Kent) نے خبردار کیا ہے کہ امریکی صدر ڈونلڈ ٹرمپ کو ایران کے ساتھ جاری تنازع سے فوری طور پر پیچھے ہٹ جانا چاہیے، اس سے پہلے کہ یہ صورتحال مزید خراب اور قابو سے باہر ہو جائے۔
یہ بھی پڑھیں:
"جنگ کا جواز ہی جھوٹ نکلا”:جوئے کینٹ کا استعفیٰ اور تلسی گبارڈ کی گواہی: کیا ڈونلڈ ٹرمپ کو مواخذے (Impeachment) کا سامنا کرنا پڑے گا؟
جو کینٹ کا ماننا ہے کہ امریکی فوجی طاقت کے زور پر آبنائے ہرمز (Strait of Hormuz) کو زبردستی کھلوانے کی کوشش ایک بہت بڑی حماقت ہوگی، جس سے خطے میں ایک ایسی ہولناک اور طویل مدتی جنگ چھڑ سکتی ہے جو سالوں تک جاری رہے گی اور اس کے نتائج انتہائی تباہ کن ہوں گے۔
سابق انٹیلی جنس سربراہ نے ایران کے خلاف نئے فضائی حملوں کو روکنے کے بروقت فیصلے کی بھرپور خراج تحسین پیش کرتے ہوئے کہا ہے کہ صدر ٹرمپ اس موقع کو غنیمت جان کر فتح کا باضابطہ اعلان کریں اور مشرق وسطیٰ میں پھنسی ہوئی امریکی افواج کو بحفاظت گھر واپس لانے کا عمل شروع کریں۔
جو کینٹ کا واضح کہنا ہے کہ اس تنازع کی قیمت پہلے ہی بہت زیادہ چکانی پڑ چکی ہے، اور مزید تباہی مول لینے کے بجائے ‘تحمل اور بردباری’ سے کام لینا ہی واشنگٹن کے لیے سب سے عقلمندانہ اور بہترین قدم ہوگا۔