اٹک ؛ کوبرا گینگ کا خاتمہ، سہیل ظفر چٹھہ ، اور دو سردار پولیس افسر دہشت کے خلاف جنگ کے ہیرو بن گئے

تحریر :اسد مرزا
جہاں لفظ بے نقاب ہوں۔۔۔ وہیں سے سچ کا آغاز ہوتاہے
اٹک میں برسوں سے خوف اور دہشت کی علامت سمجھے جانے والے بدنام زمانہ کوبرا گینگ کے خاتمے کر دیا گیا ہے ۔ پولیس کے مطابق گینگ کا مبینہ سرغنہ زرغام اللہ اسکا والد خالد ہری پور میں ایک آپریشن کے دوران پولیس مقابلے میں مارا گیا جبکہ اسکے ساتھی مائیکل وغیرہ بھی جہلم اور دیگر علاقوں میں مارے گئے جس کے ساتھ ہی اٹک کی تاریخ کے خطرناک ترین جرائم پیشہ نیٹ ورک کا باب بند ہو گیا ہے۔
ذرائع کے مطابق کوبرا گینگ کی کمر توڑنے کی بنیاد اس وقت رکھی گئی تھی جب موجودہ سی پی او گوجرانوالہ سردار غیاث گل بطور ڈی پی او اٹک تعینات تھے۔ انہوں نے ضلع بھر میں پولیس ٹیموں، خصوصاً ایس ایچ اوز کی نئی حکمت عملی کے تحت ازسرنو تشکیل کی، جس کے بعد کارروائیوں کا سلسلہ شروع ہوا اور گینگ کے متعدد مبینہ ارکان پولیس مقابلوں میں مارے گئے۔ تاہم گینگ کا مبینہ سرغنہ زرغام اللہ اس وقت فرار ہونے میں کامیاب ہو گیا تھا۔ پولیس کے مطابق حالیہ دنوں میں زرغام اللہ نے اپنے آبائی علاقے ماڑی کے ایک قریبی دوست سے بھاری تاوان کا مطالبہ کیا۔ مبینہ انکار پر دوست کی بیٹی کے اغوا کی اطلاع سامنے آئی۔ پولیس کا کہنا ہے کہ چونکہ اشتہاری کے متاثرہ خاندان سے پرانے تعلقات تھے، اس لیے ابتدائی تحقیقات میں لڑکی کے اپنی مرضی سے جانے کے شواہد بھی زیرِ غور ہیں، جبکہ واقعے کی مزید تفتیش جاری ہے۔
ڈی پی او اٹک سردار مہوران سنگھ نے واقعے کے بعد خصوصی ٹیمیں تشکیل دیں، جبکہ سی سی ڈی کی ٹیمیں بھی آپریشن میں شامل ہو گئیں۔ دن رات جاری انٹیلی جنس بیسڈ کوششوں کے بعد گزشتہ روز ہری پور میں زرغام اللہ کی موجودگی کی اطلاع ملی، جس پر مشترکہ کارروائی کی گئی۔ پولیس کے مطابق آپریشن کے دوران ہونے والے مقابلے میں زرغام اللہ مارا گیا۔ پولیس حکام کا کہنا ہے کہ اس کارروائی کے بعد کوبرا گینگ عملاً ختم ہو چکا ہے اور اٹک میں برسوں سے پھیلی خوف کی فضا کے خاتمے کی امید پیدا ہوئی ہے۔ مقامی حلقوں میں اس کامیابی کو دو پولیس افسران، سردار غیاث گل اور سردار مہوران سنگھ کی مسلسل حکمت عملی اور قیادت کا نتیجہ قرار دیا جا رہا ہے، جنہوں نے مختلف ادوار میں اس خطرناک گینگ کے خلاف فیصلہ کن کردار ادا کیا۔