چکوال: (مہتاب نصیر اعوان سے)
ملک بھر کی طرح ضلع چکوال میں بھی مون سون کی موسلادھار بارش کا سلسلہ جاری ہے، جس کے باعث موسم خوشگوار ہو گیا ہے اور کئی ہفتوں سے جاری شدید گرمی اور حبس کا زور ٹوٹ گیا ہے۔ بارش کے آغاز کے ساتھ ہی شہریوں نے راحت کا سانس لیا، تاہم مختلف نشیبی علاقے زیرِ آب آ گئے جبکہ شہر اور دیہی علاقوں کی متعدد سڑکوں، گلیوں اور بازاروں میں بارش کا پانی جمع ہونے سے معمولاتِ زندگی متاثر ہوئے اور ٹریفک کی روانی بھی سست پڑ گئی۔محکمہ موسمیات کے مطابق مون سون کا موجودہ سلسلہ 24 جولائی تک جاری رہنے کا امکان ہے، جبکہ ضلع چکوال سمیت پنجاب کے مختلف علاقوں میں وقفے وقفے سے مزید موسلادھار بارشوں کی پیشگوئی کی گئی ہے۔ محکمہ نے شہریوں کو ہدایت کی ہے کہ غیر ضروری سفر سے گریز کریں، نشیبی علاقوں، برساتی نالوں اور ندی نالوں کے قریب احتیاط برتیں اور خراب موسم کے دوران حفاظتی تدابیر اختیار کریں۔
ضلعی انتظامیہ اور متعلقہ اداروں کو الرٹ رہنے کی ہدایات جاری کر دی گئی ہیں تاکہ کسی بھی ہنگامی صورتحال سے بروقت نمٹا جا سکے۔ انتظامیہ نے شہریوں سے اپیل کی ہے کہ وہ بارش کے دوران غیر ضروری طور پر گھروں سے باہر نکلنے سے گریز کریں، بجلی کی ٹوٹی ہوئی تاروں اور پانی میں ڈوبے برقی آلات سے دور رہیں، جبکہ کسی بھی ہنگامی صورتحال کی صورت میں فوری طور پر متعلقہ اداروں سے رابطہ کریں۔ مون سون بارشوں کے اس سلسلے کے پیش نظر تمام متعلقہ محکمے ممکنہ صورتحال سے نمٹنے کے لیے ہائی الرٹ ہیں۔