لاہور/شنگھائی:مشیر وزیراعلیٰ پنجاب برائے مصنوعی ذہانت (اے آئی) اور خصوصی اقدامات علی ڈار نے اپنے دورۂ چین کے دوران شنگھائی میں ہواوے کے معروف ‘لیان چیوہو ریسرچ اینڈ ڈویلپمنٹ سینٹر’ کا دورہ کیا ہے۔ اس دورے کا مقصد پنجاب میں ڈیجیٹل گورننس اور جدید ٹیکنالوجی کے فروغ کے لیے تعاون کو مزید مضبوط بنانا ہے۔
دورے کے دوران ہواوے کے نائب صدر جیان فینگ شین اور پینگ وانگ نے علی ڈار کا استقبال کیا اور انہیں جدید اے آئی سسٹمز، کلاؤڈ سൊلوشنز اور ڈیجیٹل گورننس کے جدید طریقوں پر تفصیلی بریفنگ دی۔ ملاقات میں پنجاب میں سرکاری خدمات کی فراہمی کو ڈیجیٹل خطوط پر استوار کرنے اور مصنوعی ذہانت کے استعمال کے حوالے سے امور پر تبادلۂ خیال کیا گیا۔
اس موقع پر گفتگو کرتے ہوئے علی ڈار نے کہا کہ وزیراعلیٰ پنجاب مریم نواز شریف کے وژن کے مطابق صوبے کو جنوبی ایشیا کا صفِ اول کا اے آئی ہب بنایا جا رہا ہے۔ انہوں نے عزم ظاہر کیا کہ مصنوعی ذہانت کے ذریعے نہ صرف حکومتی امور اور گورننس کو مزید شفاف، مؤثر اور عوام دوست بنایا جائے گا بلکہ اس سے سرکاری خدمات کی فراہمی میں رفتار اور احتساب کو بھی فروغ ملے گا۔
مشیر وزیراعلیٰ کا مزید کہنا تھا کہ عالمی ٹیکنالوجی کے اداروں کے ساتھ شراکت داری پنجاب میں اے آئی انقلاب کی بنیاد کو مضبوط کر رہی ہے۔ ‘دی آفس آف اے آئی پنجاب’ عالمی معیار کی ٹیکنالوجی کو بروئے کار لا کر عوام کو بہتر، تیز اور شفاف خدمات فراہم کرنے کے لیے پوری طرح کوشاں ہے۔ انہوں نے اس بات پر بھی زور دیا کہ مصنوعی ذہانت مستقبل میں پنجاب کی معاشی ترقی، غیر ملکی سرمایہ کاری، نئی اختراعات اور نوجوانوں کے لیے روزگار کے شاندار مواقع پیدا کرنے کا سب سے بڑا ذریعہ بنے گی۔