نواب شاہ (نمائندہ بے نقاب نیوز: نفیس آرائیں)
صوبائی محتسبِ اعلیٰ سندھ کی ہدایات پر ریجنل ڈائریکٹر محتسبِ اعلیٰ شہید بینظیرآباد خان محمد زرداری نے ڈسٹرکٹ اکاؤنٹس آفس میں کھلی کچہری منعقد کی، جہاں سرکاری ملازمین، ریٹائرڈ ملازمین اور پنشنرز کے تنخواہوں، پنشن، جی پی فنڈ، گریجویٹی، کمیوٹیشن، ایل پی آر اور ٹریژری سے متعلق مسائل سنے گئے۔ریجنل ڈائریکٹر نے شکایات کا تفصیلی جائزہ لیتے ہوئے متعلقہ افسران کو قانون کے مطابق فوری ازالے کے احکامات جاری کیے، جبکہ متعدد درخواستوں پر موقع پر ہی کارروائی عمل میں لائی گئی۔ انہوں نے کہا کہ صوبائی محتسبِ اعلیٰ سندھ کا ادارہ عوام کو بلا معاوضہ اور بروقت انصاف کی فراہمی کے لیے مؤثر اقدامات کر رہا ہے اور کھلی کچہریوں کا مقصد شہریوں کے مسائل ان کی دہلیز پر حل کرنا ہے۔
اس موقع پر ڈسٹرکٹ اکاؤنٹس آفیسر حبیب الرحمن آرائیں نے کہا کہ دفتر سرکاری ملازمین اور پنشنرز کے مسائل ترجیحی بنیادوں پر حل کر رہا ہے، جبکہ MPG سسٹم کے ذریعے تنخواہیں براہِ راست بینک اکاؤنٹس میں منتقل کی جا رہی ہیں۔ کھلی کچہری میں ایڈیشنل ڈسٹرکٹ اکاؤنٹس آفیسر پیر بخش رند، غلام مرتضیٰ مگسی، الطاف حسین مری، طالب حسین زرداری، عبدالحمید رند اور دیگر افسران بھی موجود تھے۔