کالام میں سیف اللہ جھیل کے مقام پر سیاحوں سے بھری ایک کشتی الٹنے کے نتیجے میں ایک ہی خاندان کے 6 افراد جاں بحق اور 3 لاپتہ ہو گئے ہیں۔
ابتدائی اطلاعات کے مطابق حادثے کا شکار ہونے والی کشتی میں ایک ہی خاندان کے 8 افراد سمیت 9افراد سوار تھے۔
ریسکیو 1122 کے مطابق جھیل میں کشتی الٹنے کی اطلاع ملتے ہی امدادی ٹیمیں اور ایمبولینسیں فوری طور پر جائے وقوعہ پر روانہ کر دی گئیں۔ ابتدائی اطلاعات کے مطابق حادثے کا شکار ہونے والے سیاحوں کا تعلق پنجاب سے ہے۔ ضلعی انتظامیہ کے مطابق تمام لاشوں کو نکال کر سول ہسپتال منتقل کیا جا رہا ہے۔
ڈپٹی کمشنر سوات سہیل خان نے واقعے کی تصدیق کرتے ہوئے بتایا کہ جھیل کے مقام پر سیکشن 144 کا نفاذ تھا اور وہاں سیکیورٹی اہلکار بھی تعینات کیے گئے تھے، تاہم اس کے باوجود یہ افسوسناک حادثہ پیش آیا۔ انہوں نے بتایا کہ وہ خود ہسپتال روانہ ہو رہے ہیں تاکہ کشتی میں سوار افراد کی درست تعداد اور حادثے کی وجوہات کا مکمل جائزہ لیا جا سکے۔
گورنر خیبرپختونخوا فیصل کریم کنڈی نے کالام کشتی حادثے میں قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔ انہوں نے متعلقہ اداروں کو ہدایت کی ہے کہ لاپتہ افراد کی بازیابی کے لیے سرچ آپریشن کو بلا تعطل جاری رکھا جائے
کالام: سیف اللہ جھیل میں سیاحوں کی کشتی الٹ گئی، ایک ہی خاندان کے 6 افراد جاں بحق، 3 لاپتہ
