نواب شاہ (رپورٹ: نفیس آرائیں)
ڈپٹی کمشنر شہید بینظیرآباد عبدالصمد نظامانی کی زیر صدارت نیشنل ایکشن پلان اور اپیکس کمیٹی کے حوالے سے جائزہ اجلاس ڈپٹی کمشنر آفس کے دربار ہال میں منعقد ہوا۔اجلاس میں ضلع کی امن و امان کی صورتحال، نیشنل ایکشن پلان پر عملدرآمد، محرم الحرام کے دوران سیکیورٹی انتظامات، نفرت انگیز مواد، وال چاکنگ، لاؤڈ اسپیکر ایکٹ، غیر قانونی سرگرمیوں کی روک تھام اور مختلف محکموں کی کارکردگی کا جائزہ لیا گیا۔ڈپٹی کمشنر نے متعلقہ اداروں کو ہدایت کی کہ نیشنل ایکشن پلان کے نکات پر مؤثر عملدرآمد یقینی بنایا جائے اور محرم الحرام کے دوران مجالس و جلوسوں کے لیے فول پروف سیکیورٹی، صفائی، روشنی، پانی، طبی سہولیات اور ٹریفک انتظامات مکمل کیے جائیں۔انہوں نے اسسٹنٹ کمشنرز کو ہدایت کی کہ تیل کی قیمتوں میں کمی کے بعد ٹرانسپورٹرز سے اجلاس کرکے عوام کو کرایوں میں ریلیف فراہم کیا جائے جبکہ قاضی احمد میں غیر قانونی تیل کی فروخت کے خلاف کارروائی کی جائے۔ڈپٹی کمشنر نے حیسکو حکام کو محرم الحرام کے دوران بجلی کی بلاتعطل فراہمی اور فوڈ اتھارٹی کو غیر معیاری اشیائے خورونوش کے خلاف کارروائیاں تیز کرنے کی ہدایت کی۔اجلاس میں پاک فوج، پولیس، رینجرز، ریسکیو، لوکل گورنمنٹ، صحت، سوشل ویلفیئر اور دیگر متعلقہ محکموں کے افسران نے شرکت کی۔