مٹیاری رپورٹ عامر علی انڑ
درگاہ حضرت شاھ عبداللطیف بھٹائی پر قائم مقام سجادہ نشین سید مصطفا حسین شاھ لطیفی کی قیادت میں سائے سومار کی رسم ادا کی گئی جس میں شاھ لطیف کے راگی ، اوطاقی اور ذاکری فقیروں نے پہنچ کر شرکت کی اور رسم ادا کی گئی۔ اس موقع پر مریدوں اور عقیدت مندوں کی بڑی تعداد بھی موجود تھی۔ رسم کے بعد قائم مقام سجادہ نشین سید مصطفا حسین شاھ لطیفی نے مزار بھٹائی پر پہنچ کر ملکی ترقی، سندھ کی خوشحالی، امن، محبت اور بھائی چارے کے لیے اجتماعی دعا کی اور نیاز تقسیم کیا۔ سید مصطفا حسین شاہ لطیفی نے کہا کہ یہ محرم الحرام کے وہ ایام ہیں جن میں کربلا کے میدان میں اسلام کی سربلندی کے لیے عظیم قربانی دینے والے حضرت امام حسین علیہ السلام کی یاد تازہ کی جاتی ہے۔ انہوں نے کہا کہ یہ عقیدت، محبت اور سوگ کے دن ہیں جس میں ہم سب مسلمانوں کو ایک دوسرے کا احترام کرنا چاہیے اور شہدائے کربلا کو خراج عقیدت پیش کرنا چاہیے۔ سائے سومار کی رسم کے موقع پر پولیس کی جانب سے سیکورٹی کے سخت انتظامات کئے گئے تھے۔