جیکب آباد ، رپورٹ مجیب کھوسو
جیکب آباد پولیس نے مختلف تھانوں کی حدود میں کامیاب کارروائیاں کرتے ہوئے قتل، اقدام قتل، منشیات اور دیگر مقدمات میں مطلوب مجموعی طور پر 6 ملزمان کو گرفتار کرلیا، جبکہ ملزمان کے قبضے سے 4 غیر قانونی پستول، 10 لیٹر دیسی شراب اور شہریوں سے چھینی گئی 3 موٹر سائیکلیں بھی برآمد کرلی گئیں۔تفصیلات کے مطابق تھانہ اے سیکشن ٹھل پولیس نے مایوں کے رسم کے دوران اپنی بہن جنت خاتون کو قتل کرنے والے ملزم ظفر علی بنگلانی کو گرفتار کرکے اس کے قبضے سے آلہ قتل ٹی ٹی پستول برآمد کرلیا۔ اسی تھانے کی ایک اور کارروائی میں اقدام قتل کے مقدمے میں مطلوب ملزم نظام الدین بنگلانی کو گرفتار کرکے اس کے قبضے سے بغیر لائسنس پستول برآمد کیا گیا۔تھانہ اے سیکشن ٹھل پولیس نے اقدام قتل کے ایک اور مقدمے میں مطلوب ملزم دودو خان ملک کو بھی گرفتار کرلیا۔دوسری جانب تھانہ ایئرپورٹ پولیس نے قتل کے مقدمے کی تفتیش کے دوران گرفتار ملزم عابد علی کی نشاندہی پر آلہ قتل برآمد کرلیا، جبکہ تھانہ دوداپور پولیس نے مقدمے میں مطلوب ملزم سہراب کٹوہر کو گرفتار کرلیا۔تھانہ دوداپور پولیس نے چند روز قبل چھینی گئی ایک موٹر سائیکل برآمد کرکے اصل مالک صالح منگی کے حوالے کردی، جبکہ گڑہی خیرو پولیس نے ڈکیتی کے دوران شہری حاجی رستم خان بروہی سے چھینی گئی موٹر سائیکل برآمد کرکے مالک کے حوالے کردی۔ادھر سی آئی اے جیکب آباد پولیس نے پیچوہا گوٹھ میں کارروائی کرتے ہوئے ملزم عاشق علی کوریجو کو گرفتار کرکے اس کے قبضے سے 10 لیٹر دیسی شراب برآمد کرلی۔تھانہ مبارکپور پولیس نے قتل کے مقدمے میں مطلوب ملزم رسول بخش سرکی کو گرفتار کرلیا، جبکہ تھانہ آباد پولیس نے ڈکیتی کے دوران چھینی گئی ایک اور موٹر سائیکل برآمد کرکے اصل مالک محمد بخش کیہر کے حوالے کردی۔