واشنگٹن: امریکی صدر ڈونلڈ ٹرمپ نے نئے ’’ایئر فورس ون‘‘ طیارے کی رونمائی کر دی ہے، جو دراصل قطر کی جانب سے فراہم کردہ ایک خصوصی بوئنگ 747 طیارہ ہے جسے جدید ترین سہولتوں سے آراستہ کرکے امریکی صدر کے سرکاری طیارے میں تبدیل کیا گیا ہے۔
جوائنٹ بیس اینڈریوز میں منعقدہ تقریب سے خطاب کرتے ہوئے صدر ٹرمپ نے کہا کہ یہ طیارہ ’’فضا میں اڑنے والا وائٹ ہاؤس‘‘ ہے اور اس کی آسائشیں اور سہولتیں دنیا کے کسی بھی سربراہِ مملکت کے طیارے سے بڑھ کر ہیں۔ نئے ایئر فورس ون کو پرانے نیلے رنگ کے بجائے سرخ، سفید اور گہرے نیلے رنگوں کی نئی اسکیم دی گئی ہے۔ طیارے کے عقب میں ایک بڑا امریکی پرچم جبکہ داخلی حصے پر صدارتی مہر نصب کی گئی ہے۔
فضائیہ کے مطابق طیارے میں کی گئی ترامیم میں سکیورٹی، مشن کمیونیکیشنز، لاجسٹکس سپورٹ اور جدید ٹیکنالوجی اپ گریڈ شامل ہیں۔ بیان میں مزید کہا گیا کہ پہلے سے استعمال شدہ اس طیارے میں موجود کسی بھی ممکنہ خطرے کو ’غیر مؤثر‘ کر دیا گیا ہے۔
صدر ٹرمپ نے اعلان کیا کہ وہ اگلے ماہ ترکیہ کے شہر انقرہ میں ہونے والے نیٹو سربراہی اجلاس میں اسی نئے طیارے کے ذریعے شرکت کریں گے۔ انہوں نے یہ بھی بتایا کہ فرانس میں منعقدہ جی-7 اجلاس سے واپسی ان کے پرانے ایئر فورس ون کا آخری سرکاری سفر تھا۔ ٹرمپ نے کہا کہ جب امریکہ کا صدر لندن، برلن یا دنیا کے کسی اور بڑے شہر میں اترے تو امریکی وقار اور طاقت کی نمائندگی سب سے نمایاں ہونی چاہیے۔ ان کے مطابق نئے طیارے کا ڈیزائن ان کی ذاتی پسند کے مطابق تیار کیا گیا ہے۔
یہ طیارہ عارضی طور پر استعمال کیا جائے گا جب تک بوئنگ کمپنی کی جانب سے تیار کیے جانے والے نئے صدارتی طیارے 2028 میں امریکی فضائیہ کے حوالے نہیں کر دیے جاتے۔ بوئنگ کے یہ طیارے پہلے 2024 میں فراہم کیے جانے تھے تاہم مختلف تکنیکی اور انتظامی وجوہات کے باعث ان کی فراہمی میں تاخیر ہوئی۔ قطری طیارے کو امریکی فضائیہ کی سخت سکیورٹی ضروریات کے مطابق تبدیل کیا گیا ہے۔ فضائیہ کے مطابق اس میں مواصلاتی، دفاعی اور حفاظتی نظام نصب کیے گئے ہیں جو امریکی صدر کے سرکاری سفر کے لیے لازمی سمجھے جاتے ہیں۔
قطر کی جانب سے دیے گئے اس مہنگے طیارے پر ماضی میں اخلاقی اور قانونی سوالات بھی اٹھائے گئے تھے، تاہم ٹرمپ انتظامیہ کا مؤقف ہے کہ یہ طیارہ صرف عبوری مدت کے لیے استعمال ہوگا اور مستقبل میں اسے صدارتی لائبریری کے حوالے کیا جا سکتا ہے۔
قطری طیارے کو شامل کیے جانے سے قبل ایئر فورس ون کے بیڑے میں دو 747-200B طیارے شامل تھے جو 1990 سے استعمال میں ہیں۔ وائٹ ہاؤس کے کمیونیکیشنز ڈائریکٹر سٹیون چیونگ کے مطابق ان پرانے ماڈلز میں سے ایک کا استعمال اب بظاہر مرحلہ وار ختم کر دیا گیا ہے۔
’’ اڑتا ہوا وائٹ ہاؤس ’’ٹرمپ نے نئے ’’ایئر فورس ون‘‘ کی رونمائی کردی،
