جیکب آباد رپورٹ مجیب کھوسو
جیکب آباد محرم الحرام کے دوران امن و امان کی صورتحال کو برقرار رکھنے اور شہریوں کے جان و مال کے تحفظ کو یقینی بنانے کے لیے ایس ایس پی جیکب آباد کیپٹن (ر) فیضان علی کی ہدایات پر ضلع کی تینوں تحصیلوں جیکب آباد، ٹھل اور گڑھی خیرو میں پولیس اور رینجرز کی جانب سے فلیگ مارچ کیا گیا۔تفصیلات کے مطابق متعلقہ سب ڈویژنز میں ایس ڈی پی اوز کی سربراہی میں ہونے والے فلیگ مارچ میں مختلف تھانوں کے ایس ایچ اوز، پولیس افسران، اہلکاروں اور رینجرز کی بھاری نفری نے شرکت کی۔ فلیگ مارچ اہم شاہراہوں، بازاروں، امام بارگاہوں، مجالس اور جلوسوں کے روٹس سے گزرا جبکہ سیکیورٹی انتظامات کا بھی جائزہ لیا گیا۔پولیس حکام کے مطابق فلیگ مارچ کا مقصد محرم الحرام کے دوران امن و امان کو برقرار رکھنا، عوام میں احساسِ تحفظ پیدا کرنا اور شرپسند عناصر کو یہ واضح پیغام دینا ہے کہ جیکب آباد پولیس ہر وقت الرٹ ہے اور کسی بھی ناخوشگوار واقعے سے نمٹنے کے لیے مکمل طور پر تیار ہے۔