تحریر:اسد مرزا
جہاں لفظ بے نقاب ہوں۔۔۔ وہیں سے سچ کا آغاز ہوتاہے
کراچی میں “کوکین کوئین” انمول عرف پنکی کی گرفتاری نے کئی خطرناک سوالات کھڑے کر دیے ہیں۔ پولیس کے مطابق ملزمہ کراچی سے لاہور، اسلام آباد اور راولپنڈی تک پھیلا منظم منشیات نیٹ ورک چلا رہی تھی، مگر حیرت یہ ہے کہ اتنا بڑا دھندا آخر کس کی سرپرستی میں چلتا رہا؟
آن لائن آرڈرز، خواتین رائیڈرز، کروڑوں کی کوکین اور جدید سپلائی سسٹم نے یہ تاثر مضبوط کر دیا ہے کہ یہ کوئی عام اسٹریٹ کرائم نہیں بلکہ طاقتور سہولت کاروں کے بغیر ممکن ہی نہیں تھا۔
معاملہ اس وقت مزید مشکوک ہو گیا جب پنکی کو عدالت میں بغیر ہتھکڑی اور پروٹوکول کے ساتھ پیش کیا گیا، جس پر آئی جی سندھ کو نوٹس لینا پڑا اور اہلکار معطل کر دیے گئے۔ لیکن اہلکاروں کو حکم دینے والے افسران کا نام بے نقاب نہیں ہوا جو تحقیقاتی کمیٹی کو سامنے لانا ہوگا ۔کراچی پولیس کے کچھ عناصر اس نیٹ ورک سے واقف تھے یا پھر سب کچھ خاموشی سے چلنے دیا جا رہا تھا؟ تحقیقات کا اصل امتحان یہ ہے کہ کیا صرف “پنکی” کو قربانی کا بکرا بنایا جائے گا یا اس کے پیچھے موجود بڑے کردار بھی بے نقاب ہوں گے؟