ڈپٹی کمشنر شہید بینظیرآباد عبدالصمد نظامانی نے ڈی سی آفس چوک پر پودا لگا کر شجرکاری مہم کا افتتاح کر دیا

نوابشاہ (رپورٹ نفیس آرائیں) ڈپٹی کمشنر شہید بینظیرآباد عبدالصمد نظامانی نے ضلع میں ماحولیاتی بہتری، سرسبز اور صاف ستھرے ماحول کے فروغ کے لیے سندھ انٹیگریٹڈ ایمرجنسی اینڈ ہیلتھ سروسز شہید بینظیرآباد کے تعاون سے ڈی سی آفس چوک پر پودا لگا کر باقاعدہ شجرکاری مہم کا افتتاح کیا۔اس موقع پر ڈپٹی کمشنر عبدالصمد نظامانی نے کہا کہ بڑھتی ہوئی گرمی، موسمیاتی تبدیلیوں اور آلودگی پر قابو پانے کے لیے درخت لگانا انتہائی ضروری ہے۔ انہوں نے کہا کہ درخت انسانوں کے لیے قدرتی نعمت ہیں جو نہ صرف ماحول کو صاف رکھتے ہیں بلکہ گرمی کی شدت میں کمی لانے کے ساتھ صحت مند زندگی کے لیے بہتر ماحول بھی فراہم کرتے ہیں۔انہوں نے مزید کہا کہ ضلع بھر میں مختلف سرکاری اداروں، اسکولوں، کالجوں اور عوامی مقامات پر درخت لگانا وقت کی اہم ضرورت ہے جبکہ لگائے گئے پودوں کی حفاظت کو بھی یقینی بنایا جائے۔ انہوں نے شہریوں خصوصاً نوجوانوں سے اپیل کی کہ وہ زیادہ سے زیادہ شجرکاری مہم میں حصہ لیں تاکہ آنے والی نسلوں کے لیے سرسبز اور صاف ماحول فراہم کیا جا سکے۔اس موقع پر ڈسٹرکٹ مينيجر ایس آئی ای ایچ ایس اقصیٰ جمالی نے بتایا کہ ان کے ادارے کی جانب سے ڈی سی آفس چوک سے قاضی احمد موڑ تک مختلف اقسام کے درخت لگائے جائیں گے، جس کا مقصد بڑھتے ہوئے درجہ حرارت میں کمی لانا ہے۔