آزاد کشمیر انتخابات : نواز شریف کی زیرِ صدارت مسلم لیگ (ن) پارلیمانی بورڈ کا اہم اجلاس طلب

لاہور : پاکستان مسلم لیگ (ن) کے قائد میاں محمد نواز شریف نے آزاد کشمیر کے آئندہ انتخابات کے لیے پارٹی کی سیاسی سرگرمیوں کو حتمی شکل دینے کا فیصلہ کر لیا ہے۔ اس سلسلے میں انہوں نے مسلم لیگ (ن) آزاد کشمیر پارلیمانی بورڈ کا ایک اہم اجلاس طلب کر لیا ہے، جو لاہور میں پارٹی سیکرٹریٹ ماڈل ٹاؤن میں منعقد ہوگا۔
ذرائع کے مطابق اس اہم اجلاس کی صدارت خود نواز شریف کریں گے۔ اجلاس میں وزیراعلیٰ پنجاب مریم نواز سمیت پارٹی کی مرکزی قیادت شریک ہوگی۔ پارلیمانی بورڈ کے اراکین میں رانا ثناء اللہ، خواجہ سعد رفیق، حمزہ شہباز اور آزاد کشمیر کے سابق وزیراعظم راجہ فاروق حیدر شامل ہوں گے۔ مزید برآں، اہم وفاقی وزراء اور سینئر رہنما اسحاق ڈار، احسن اقبال اور خواجہ آصف بھی مشاورت کا حصہ بنیں گے۔
اجلاس کا بنیادی ایجنڈا آزاد کشمیر کے انتخابات کے لیے موزوں امیدواروں کا انتخاب ہے۔ ذرائع کا کہنا ہے کہ پارلیمانی بورڈ امیدواروں کے باقاعدہ انٹرویوز کرے گا، جس کے بعد ٹکٹوں کی تقسیم کا عمل شروع کیا جائے گا۔اجلاس میں مختلف حلقوں سے موصول ہونے والی درخواستوں کا جائزہ لیا جائے گا جبکہ
امیدواروں کی عوامی مقبولیت اور پارٹی وفاداری کی بنیاد پر سکروٹنی کی جائے گی جس کے علاوہآزاد کشمیر میں انتخابی مہم اور سیاسی بیانیے کو حتمی شکل دی جائے گی۔
مسلم لیگ (ن) کی قیادت کی جانب سے اس اجلاس کو انتہائی اہمیت دی جا رہی ہے، کیونکہ پارٹی آزاد کشمیر میں اپنی سیاسی پوزیشن کو مزید مستحکم کرنے اور انتخابات میں بھرپور کامیابی حاصل کرنے کے لیے پرعزم ہے۔ نواز شریف کی خود صدارت کرنا اس بات کی علامت ہے کہ پارٹی قیادت ان انتخابات کو سنجیدگی سے لے رہی ہے۔